ముస్లిం మహిళలూ భర్తలను లెక్కచెయ్యకండి-ఆర్ఎస్ఎస్

Posted: 05/08/2014 09:39 AM IST

రాష్ట్రీయ స్వయం సేవక్ సంఘ్ (ఆర్ఎస్ఎస్) నాయకుడు ఇంద్రేశ్ కుమార్ వారణాసిలో ముస్లిం వోటర్లను ఉద్దేశించి మాట్లాడుతూ భర్తల మాటలను లెక్కచెయ్యకుండా వోటు వెయ్యమని పిలుపునిచ్చారు.  

గత మూడు రోజులుగా ఆర్ఎస్ఎస్ తో అనుబంధమున్న ముస్లిం బృందాలతో మాట్లాడుతూవస్తున్న ఇంద్రేశ్ కుమార్ కాంగ్రెస్ పార్టీ సమాజ్ వాదీ పార్టీలు కావాలనే తప్పు సమాచారమిచ్చి తప్పుదోవ పట్టించే ప్రయత్నం చేస్తోందని, దానివలన వాళ్ళు చెప్పినట్లుగా వోటువేసి చిక్కులు తెచ్చుకుంటారని హెచ్చరిస్తూ, మోదీని గెలిపించవలసిన సమయం ఆసన్నమైందని, ముసల్మాన్ బాలబాలికలు ఒక చేత్తో ఖురాన్ మరో చేత్తో కంప్యూటర్ పట్టుకునే తరుణం వస్తుందని అన్నారు.  

భారతీయ అవామీ పార్టీ ఏర్పాటు చేసిన ముస్లిం మహిళ సభలో మాట్లాడుతూ, మీరు మీ భర్తలను కాని లేదా ఇంట్లో పెద్దలను కాని ఇలా నిలదీయండి- మీరు చెప్తే చేతి గుర్తుకి, సైకిల్, ఏనుగుల గుర్తులకు వోటేసాం!  మరి ఏమైంది?  మన జీవితాలేమైనా మారాయా? అని.  వాళ్ళు మీవైపు కోపంగా చూడవచ్చు.  "అయితే ఏం? భయపడాల్సిన అవసరమేముంది?" అన్నారు కుమార్.

ఆ తర్వాత ఇంద్రేశ్ కుమార్ మాట్లాడుతూ వాళ్ళకు (ముస్లింలకు) "మోదీ పట్ల నిరసన ఉంటే సమావేశాలకు వస్తారా?" అని ప్రశ్నించారు.  "ఈ సమావేశాలను నిర్వహిస్తున్నది ఆర్ఎస్ఎస్ కాదు ముస్లిం సంఘాలే" అని కూడా ఆయన వివరణనిచ్చారు.

వారణాసిలో ఎలాగైన మోదీని గెలిపించాలని ఆర్ఎస్ఎస్ సర్వవిధాలా ప్రయత్నం చేస్తోంది!

-శ్రీజ