తెలంగాణ వచ్చింది కాని పంచాయితీ అయిపోలే- కెసిఆర్

Posted: 04/15/2014 07:52 AM IST

60 సంవత్సరాల సుదీర్ఘ పోరాటం తర్వాత ప్రత్యేక తెలంగాణా కల సాకారమైందని, అయితే ఇంకా అంతా పూర్తిగా తేలలేదని, ఆంధ్రావాళ్ళతో పంచాయితీ ఇంకా అయిపోలేదని అన్నారు తెలంగాణా రాష్ట్ర సమితి అధ్యక్షుడు కె చంద్రశేఖరరావు.

నీళ్ళు, ఉద్యోగం, ఆస్తులు, అప్పుల పంపకాలు జరగాల్సి వుందని, ఇప్పుడే అప్రమత్తంగా వ్యవహరించాల్సిన అవసరం ఎంతైనా ఉందని అన్నారు కెసిఆర్ నల్గొండలో బహిరంగ సభలో మాట్లాడుతూ.  తెరాసకే ఎందుకు వోటెయ్యాలో సూటిగా చెప్పిన కెసిఆర్, ఎవరికో వోటు వేసి పని చెయ్యమని అడిగితే ఎలా కుదురుతుందని ప్రశ్నించారు.  గాడిదకు గడ్డివేసి గేదెను పాలిమ్మన్నట్లు, ముళ్ళ చెట్లకు నీళ్ళు పోసి పండ్లు ఇమ్మన్నట్లుగా కాంగ్రెస్ కి కాని మరే ఇతర పార్టీలకు కాని వోటేస్తే తెలంగాణా అభివృద్ధి కోసమే పనిచేస్తున్న తెరాస ఎలా పనిచెయ్యగలుగుతుంది అన్నది ఆయన వాదన. 

నల్గొండలో మేకల అభినవ్ స్టేడియంలో ముఖ్య అతిథిగా ప్రసంగించిన కెసిఆర్, తెలంగాణా ఇచ్చినట్లే ఇచ్చి మళ్ళీ ఆర్డినెన్స్ లు పాస్ చేసారని, ఖమ్మం జిల్లాలోని కొన్ని ప్రాంతాలను ఆంధ్రాలో కలపటానికి, ఆంధ్రాకి ప్రత్యేక కేటగిరీ ఇవ్వటానికి చేసిన ఆ ఆర్డినెన్స్ గురించి ప్రకటించినప్పుడు తెలంగాణా పిసిసి అధ్యక్షుడు ఆ పక్కనే ఉన్నాడని అన్నారాయన. 

కాంగ్రెస్ పార్టీ మీద ఇంకా ఘాటుగా విమర్శిస్తూ, తప్పతాగి మంత్రులైన వీళ్ళంతా గాలి మాటలు వదిలిపెట్టి తెలంగాణాకి ఏం చేసారో చెప్పాలని అన్నారు.  ఇంతవరకు ఏం చేసారు, ఎందుకు చెయ్యలేదు, ఇంకా ఏం వెలగబెడదామని ఎన్నికలలో పోటీ చేస్తున్నారన్నది చెప్పాలని కాంగ్రెస్ నాయకులను ప్రశ్నించారు కెసిఆర్.

అందువలన, వోటు ఎవరికి వెయ్యాలో బాగా ఆలోచించుకుని వెయ్యమని కెసిఆర్ సూచించారు.

-శ్రీజ