వైకాపా తెలంగాణా అభ్యర్థుల జాబితా

Posted: 04/09/2014 09:00 AM IST

తెలంగాణా ప్రాంతంలో 13 లోక్ సభ స్థానాలలోను, 80 అసెంబ్లీ స్థానాలలో పోటీకి వైయస్ ఆర్ కాంగ్రెస్ పార్టీ తన అభ్యర్థుల జాబితాను విడుదల చేసింది.  కొత్తగా పార్టీలో చేరిన మాజీ డిజిపి దినేష్ రెడ్డి కి లోక్ సభ స్థానం లభించింది. 

లోక్ సభ అభ్యర్థులు-

1.అదిలాబాద్-  ఆదె లీలారాణి, 2. కరీం నగర్- మీసాల రాజారెడ్డి, 3. నిజామాబాద్-ఎన్ రవీందర్ రెడ్డి, 4. జహీరాబాద్- ఎమ్ డి మొహియిద్దీన్, 5. మల్కాజ్ గిరి- దినేష్ రెడ్డి, 6. హైద్రాబాద్- బొడ్డు సాయినాధ రెడ్డి, 7. నాగర్ కర్నూల్- జెట్టి ధర్మరాజు, 8. నల్గొండ- గున్నం నాగిరెడ్డి, 9. మహబూబాబాద్- తెల్లం వెంకట్రావు, 10. ఖమ్మం- పొంగులేటి శ్రీనివాస రెడ్డి, 11. చేవెళ్ళ- కొండా రాఘవరెడ్డి, 12. మహబూబ్ నగర్- అబ్దుల్ రెహమాన్, 13. మెదక్- ప్రభు గౌడ్.

తెలంగాణా రాష్ట్ర ఏర్పాటుకు వ్యతిరేకంగా సమైక్యాంధ్ర నినాదాలు చేసినవారు, రాష్ట్ర విభజన జరుగుతుందని తెలియగానే రాజీనామాలు చేసి నిరసనలు తెలియజేసిన వైయస్ ఆర్ కాంగ్రెస్ పార్టీ 13 లోక్ సభ స్థానాలకు, 80 అసెంబ్లీ స్థానాలకు అభ్యర్థులను పోటీకి నిలబెట్టగా, తెలంగాణా రాష్ట్ర ఆవిర్భావానికి అభ్యంతరం లేదని, కాంగ్రెస్ నిర్ణయం తీసుకుంటే మద్దుతనిస్తామని ప్రకటించిన తెలుగు దేశం పార్టీ మాత్రం తెలంగాణాలో స్థానాన్ని కోల్పోయి భారతీయ జనతా పార్టీతో కలిసి పోటీ చెయ్యవలసి వస్తోంది. 

అదీ తెలంగాణా రాష్ట్ర సమితి ఆడిన రాజకీయం.  ఎప్పుడు రాష్ట్ర విభజన చర్చకు వచ్చినా, లేదా తెలంగాణాలో అభివృద్ధి గురించి మాట వచ్చినా తెరాస పెద్ద ఎత్తున తెదేపాను ఎండగడుతుండేది.  తెలంగాణా, ఆంధ్ర ఇరు ప్రాంతాలు నాకు రెండు కళ్లలాంటివని చెప్పిన చంద్రబాబు నాయుడు మాటలను వక్రీకరించి, హాస్యంలోకి మార్చి రెండు కళ్ళ సిద్ధాంతంగా ప్రచారం చేసిన తెరాస తో పాటు కాంగ్రెస్ పార్టీ, వైయస్ ఆర్ పార్టీ కూడా ఇతర పార్టీల గురించి ఏం మాట్లాడినా తప్పని సరిగా తెదేపానే లక్ష్యంగా విమర్శలు గుప్పించేవారు.  మిగిలిన పార్టీలన్నిటికీ తెదేపా మీద విరుచుకు పడటమే ధ్యేయంగా నిలిచింది.  అందుకే తెదేపా తెలంగాణాలో నిలదొక్కుకోలేకపోయింది. 

విచిత్రమేమిటంటే, తెలంగాణాలో మాట్లాడేటప్పుడు తెలంగాణాకు వ్యతిరేకని, సీమాంధ్రలో మాట్లాడేటప్పుడు చంద్రబాబు వలనే రాష్ట్రం విడిపోయిందని అన్ని పార్టీల వారూ చెప్పటం చేస్తుండేవారు.  అందుకు వైకాపా మినహాయింపేమీ కాదు! 

-శ్రీజ