ఐదు గరిష్ట సూత్రాలతో గద్దె ఎక్కుతున్న ఆప్ పార్టీ

Posted: 12/23/2013 05:03 PM IST

ఆమ్ ఆద్మీ పార్టీ ఢిల్లీలో కూకటివేళ్ళతో పాతుకుపోయివున్న కాంగ్రెస్ పార్టీని కూకటివేళ్ళతో పెకిలించటమే కాకుండా ఆ పార్టీ మద్దతుతోనే ఆ గద్దెను ఎక్కటం విశేషం. చరిత్రలో ఇంతవరకు జరగని పని ఇది. అంతే కాదు ప్రచారానికి ఎక్కువగా సొమ్ముని వెచ్చించకుండా 70 కి 28 సీట్లను సంపాదించటం మామూలు విషయం కాదు. అదీ నరేంద్ర మోదీకి దేశ స్థాయిలో అమోఘమైన మద్దతు ఉన్న తరుణంలో.

 

ఢిల్లీలో కార్లకున్న ఎర్రబుగ్గలను ఎత్తివేసి వారి విఐపి కోరలను పీకివేస్తానని, నీరు విద్యుత్ ఛార్జీలను తగ్గిస్తానని, ప్రతి ఇంటికీ 700 లీటర్ల వరకు ఉచితంగా నీటిని సరఫరా చేస్తానని, పటిష్టమైన లోక్ పాల్ ని స్థాపించటానికి కృషి చేస్తానని వాగ్దానం చెయ్యటమే కాక స్వయం నియంత్రణ విధానంలో ప్రజాభిప్రాయంతో నే అన్ని నిర్ణయాలు జరుగుతాయని చెప్పటమే కేజ్రివాల్ విజయానికి కారణాలు. ఇవి ఆయన చేసిన వాగ్దానాల్లో అత్యంత గరిష్టమైనవి, కీలకమైనవి. చివరిదైన స్వయం నియంత్రణా విధానాన్ని అనుసరించి పోయిన వారంలో ఢిల్లీలో 272 సమావేశాలు నిర్వహించి ఢిల్లీలో ఆమ్ ఆద్మీ పార్టీ ప్రభుత్వాన్ని నెలకొల్పాలా లేదా అన్న విషయాల మీద చర్చ చెయ్యటం జరిగింది.

 

ఫలితంగా ఈ రోజు కేజ్రివాల్ లెఫ్ట్ నెంట్ గవర్నర్ ని కలిసి ఢిల్లీలో తన పార్టీ నుంచి ప్రభుత్వాన్ని నెలకొల్పటానికి తన ఆమోదాన్ని తెలియజేసారు. ఆయన రామ్ లీలా మైదాన్ లో శపథ స్వీకారం చేస్తారు.

 

-శ్రీజ