సీమాంధ్రలో జేఏసీ వచ్చేసింది

Posted: 09/18/2013 08:42 AM IST

తెలంగాణ రాష్ట్ర ఏర్పాటు కోసం (జేఏసీ) జాయింట్ యాక్షన్ కమిటీ గా ఏర్పడి, రాష్ట్రం కోసం ఉద్యమిస్తున్న తెలంగాణ వాదులను సమైక్యంధ్ర వారు బాగా ఫాలో అవుతున్నారు. ఉద్యమంలో తెలంగాణ వాదులను అనుసరించడమే కాకుండా, ఇప్పుడు జేఏసీని కూడా ఏర్పాటు చేశారు. ఆంధ్రప్రదేశ్ రాష్ట్రాన్ని సమైక్యంగా కొనసాగించడమే లక్ష్యంగా సమైక్యాంధ్ర జాయింట్ యాక్షన్ కమిటీ(జేఏసీ) ఏర్పాటు చేశారు. ఈ జేఏసీని ‘ఆంధ్రప్రదేశ్ పరిరక్షణ సమితి ’ గా వ్యవహరిస్తారు. ఈ జేఏసీకి రాష్ట్ర సమన్వయకర్తగా జనచైతన్య వేదిక అధ్యక్షుడు వి.లక్ష్మణరెడ్డిని ఎన్నుకున్నారు. ఇందులోకి విద్యార్థులు, ఉద్యోగులు, కర్షకులు, కార్మికులు సహా అన్ని వర్గాల వారు వస్తారని, వారందరిని కలుపుకొని సమైక్యంధ్ర ప్రదేశ్ కోసం ఉద్యమిస్తామని, దీనిని త్వరలోనే అన్ని జిల్లాల్లో విస్తరించాలని హైదరాబాద్ బంజారాహిల్స్‌లో సమైక్యవాదులు నిర్వహించిన రౌండ్‌టేబుల్ సమావేశంలో నిర్ణయించారు. ఈ సందర్భంగా .రాష్ట్ర విభజన జరిగితే ఉద్యమాలు వస్తాయని, కొత్త రాష్ట్రాల డిమాండ్‌లు వస్తాయని శ్రీకృష్ణ కమిటీ చెప్పినా పట్టించుకోకుండా కేంద్రం నిర్ణయం తీసుకోవడం దారుణమని అన్నారు. అయితే తెలంగాణ వాదులు మాత్రం దీని ఏర్పాటు వెనుక రాజకీయ నేతల హస్తం ఉందని అంటున్నారు.