రాజీ డ్రామాల పై కేటీఆర్ ఫైర్

Posted: 07/25/2013 08:32 PM IST

రేపు జరగబోయే సీడబ్ల్యూసీ సమావేశంలో కాంగ్రెస్ పార్టీ ఏదో ఒక ఖచ్చితమైన నిర్ణయాన్ని తీసుకుంటుందనే వార్తలు వెలువడిన తరుణంలో మళ్లీ సీమాంధ్ర నేతలు నాటకాల ‘రాజీ డ్రామాలు ’ మొదలు పెట్టారు. గతంలో కూడా డిసెంబర్ 9 ప్రకటన తరువాత ఇలానే చేయడంతో అధిష్టానం ఆ నిర్ణయం పై వెనక్కి తగ్గింది. ఇప్పుడు మళ్లీ సమైక్య రాష్ట్రం కోరుతూ రాజీనామాలకు తెర తీశారు. కాంగ్రెస్ ఎమ్మెల్యే వీరశివారెడ్డి సమైక్య రాష్ట్రం కోరుతూ తన పదవికి పార్టీకి రాజీనామా చేస్తున్నట్లు ప్రకటించడంతో ఆయనతో పోటీగా వై.ఎస్.ఆర్.కాంగ్రెస్ ఎమ్మెల్యేలు ఏడుగురు రాజీనామా చేశారు . ఈ రాజీనామాల పై టీఆర్ఎస్ ఎమ్మెల్యే, కాంగ్రెస్ పార్టీ నాయకుడు జీవన్ రెడ్డి మండి పడ్డారు. సీమాంధ్ర ఎమ్మల్యేలవి రాజీనామా డ్రామాలని తెలంగాణ రాష్ట్ర సమితి మండి పడింది.తెలంగాణపై కేంద్ర ప్రభుత్వం ఓ నిర్ణయం తీసుకుంటున్న తరుణంలో సీమాంధ్ర నేతలు మరోసారి రాజీనామాల డ్రామాకు తెరదీశారని టిఆర్ఎస్ నేత, సిరిసిల్ల ఎమ్మెల్యే కె.తారకరామారావు విమర్శించారు. సీఎం కిరణ్‌తో సహా సీమాంధ్ర మంత్రులు తెలంగాణను అడ్డుకునేందుకు కుట్రలు పన్నుతున్నారని ఆయన ధ్వజమెత్తారు. సీమాంధ్ర కాంగ్రెస్ నేతలు దిక్కార స్వరాన్ని అధిష్టానం నియంత్రించాలని, రెండువేల తొమ్మిది డిసెంబరు తొమ్మిదిన తెలంగాణ ప్రకటన చేసినప్పుడు పార్టీ గీత దాటినవారిపై వేటు వేసి ఉంటే పరిస్థితి ఇలా ఉండేది కాదని కాంగ్రెస్ నేత, మాజీ మంత్రి టి.జీవన్ రెడ్డి అన్నారు.