కులాల పేర్లతో సభలు ఊరేగింపులకు చెల్లు

Posted: 07/11/2013 04:21 PM IST

ఉత్తర్ ప్రదేశ్ లో కుల ప్రాతిపదికన జరిగే నిరసన ఊరేగింపులు నిషేధించింది అలహాబాద్ హైకోర్ట్.  ఈ నిర్ణయాన్ని కేంద్ర ప్రభుత్వానికి, రాష్ట్ర ప్రభుత్వానికి, ఎన్నికల కార్యాలయానికి నోటీసుల ద్వారా తెలియజేయటం జరిగింది.  అలాగే రాజకీయ పార్టీలైన కాంగ్రెస్, భాజపా, బసపా, సపాలకు కూడా కోర్టు నోటీసులు పంపించింది. 

ఈ మధ్యకాలంలో ఉత్తర ప్రదేశ్ లో బ్రహ్మణ్ భాయిచారా పేరుతో 40 జిల్లాల్లో ఊరేగింపులు జరిగాయి.  అందులో ఒక సభలో మాజీ ముఖ్యమంత్రి మాయావతి కూడా పాల్గొన్నారు.  సమాజ్ వాది పార్టీ అందుకు దీటుగా ముస్లిం సమ్మేళన్ అంటూ సభలు నిర్వహించింది.  ఈ నేపథ్యంలో జస్టిస్ ఉమానాథ్ సింగ్, జస్టిస్ మహేంద్ర దయాళ్ ల హైకోర్టు బెంచ్ తక్షణమే అమలుపరచమని చెప్తూ, కులాల ప్రాతిపదికన జరిగే సభలు ఊరేగింపులను నిషేధించింది. 

స్థానిక న్యాయవాది మోతిలాల్ యాదవ్ వేసిన ప్రజాప్రయోజన వ్యాజ్యం దృష్ట్యా ఈ నిర్ణయం తీసుకున్న హైకోర్టు నిషేధంతో రాజకీయ పార్టీల రాజకీయ ఎత్తుగడలకు కళ్ళెం పడింది.   రాజకీయ పార్టీలు చేస్తున్న బ్రాహ్మణ, క్షత్రియ, వైశ్య కులాల సభల వలన సమాజంలో సమతౌల్యం దెబ్బతింటున్నదని, ఇది రాజ్యాంగ విరుద్ధమని పిల్ వేసిన యాదవ్ అభియోగం. 

-శ్రీజ