Posted: 02/21/2013 10:10 PM IST

నగరంలోని దిల్‌సుఖ్‌నగర్‌లో  ఈ రోజు సాయంత్రం రెండు చోట్ల బాంబు పేలుళ్లు జరిగాయి. ఈ ఘటనలో 22 దుర్మరణం చెందగా  50 మంది తీవ్రంగా గాయపడ్డారు. వెంకటాద్రి, కోణార్క్ థియేటర్లలో జంట పేలుళ్లు జరిగినట్లు తెలియవచ్చింది. పేలుళ్లతో ప్రజలు భయభ్రాంతులకు గురై పరుగులు తీశారు. ఆ సమయంలో తొక్కిలాట జరిగింది. సమాచారం తెలుసుకున్న పోలీసులు బాంబు స్క్వాడ్ సిబ్బందితో సంఘటనా ప్రదేశానికి చేరుకుని తనిఖీలు చేస్తున్నారు.  దిల్‌షుక్‌నగర్‌లో సంభవించిన బాంబు పేలుళ్ల సంఘటనపై ప్రధాన మంత్రి డాక్టర్ మన్ మోహన్ సింగ్, యు.పి.ఎ. అధ్యక్షురాలు సోనియా గాంధి, హోం మంత్రి సుశీల్ కుమార్ షిండే తీవ్ర ఆందోళన వ్యక్తం చేశారు. షిండే ముఖ్యమంత్రి కిరణ్‌తో ఫోన్‌లో మాట్లాడి పరిస్థితిని తెలుసుకుంటున్నారు. ఈ దుర్ఘటన గురించి ఆయన ఢిల్లీనుంచే పర్యవేక్షిస్తున్నారు.

ముఖ్యమంత్రి కిరణ్ కుమార్ రెడ్డి ఈ దుర్ఘటన జరిగిన వెంటనే పోలీసు ఉన్నతాధికారులతో మాట్లాడి వివరాలు తెలుసుకున్నారు. పోలీసు అధికారులు ఎప్పటికప్పుడు ముఖ్యమంత్రికి ఈ సంఘటన గురించి వివరాలు అందజేస్తున్నారు. దుర్ఘటన గురించి తెలిసిన వెంటనే ముఖ్యమంత్రి కిరణ్ కుమార్ రెడ్డి, హోం మంత్రి సబితా ఇంద్రారెడ్డి హుటాహుటిన సంఘటన జరిగిన స్థలానికి బయలుదేరి వెళ్లారు. కసబ్ ఉరి శిక్ష అమలు చేయడం పట్ల నిరసన వ్యక్తం చేస్తూ గతంలోనే లష్కర్ తోయిబా నాయకుడు మహ్మద్ హైదరాబాద్, బెంగుళూరులలో బాంబు పేలుళ్లు జరుపుతామని ముందే హెచ్చరించారు. ఇప్పుడు అలాగే జరగడంతో పోలీసు ఉన్నతాధికారులు ఇంకా మరేమైనా సున్నిత ప్రాంతాలు ఉన్నాయా, మరెక్కడైనా ఇంకా బాంబు పేలుళ్లు జరిగే ప్రమాదం ఉందా అని చాలా జాగ్రత్తగా పరిస్థితిని పర్యవేక్షిస్తున్నారు.