Posted: 12/16/2012 04:39 PM IST

కర్నూలు మాజీ మేయర్ బంగి అనంతయ్య ఎక్కడున్నా అక్కడ ఓ సెన్సేషన్. తెలుగు దేశం పార్టీకి వీర విధేయుఢిగా ఉన్నప్పుడు వివిధ వేశాధారణల్లో నిరసనలు తెలిపే బంగి తెలుగుదేశం పార్టీ నుండి బహిష్కరణకు గురై ఆరు నెలల క్రితం కాంగ్రెసు పార్టీలో చేరిన విషయం తెలిసిందే. ఈ రోజు హైదరాబాదులోని ఎల్బీ స్టేడియంలో ఏర్పాటు చేసిన కాంగ్రెసు పార్టీ మేధోమధన సదస్సుకు ఆయన హాజరయ్యారు. ఈ సదస్సులో ఆయన హల్ చల్ చేశారు. ఈ సందర్భంగా మీడియాతో మాట్లాడిన ఆయన చంద్రబాబునాయుడి పై మాటల దాడి చేశారు. చంద్రబాబు నా ఉసురు తగిలి రెండుసార్లు ఇప్పటికే అధికారానికి దూరంగా ఉన్నాడని, మూడోసారి కూడా ఓడిపోతున్నాడని జోస్యం చెప్పారు. 2014 ఎన్నికల్లో టిడిపి ఓడుతుందనడంలో ఎలాంటి అనుమానం లేదన్నారు. ఈ రోజు తనను సస్పెండ్ చేసిన రోజన్నారు. తన సతీమణి మార్కెట్ యార్డులో కూలీ పని చేస్తోందని ఆవేదన వ్యక్తం చేశారు. కాంగ్రెసు పార్టీ జాతీయ పార్టీ అని.. ఈ పార్టీ పర్మినెంట్‌గా ఉంటుందన్నారు. కాంగ్రెసు సముద్రం వంటిదని దీనిని నమ్ముకున్న వాళ్ల ఎవరు నష్టపోరని, ప్రాంతీయ పార్టీలను నమ్ముకుంటే ఉపయోగం ఏం ఉండదని, ఇక పై కాంగ్రెస్ లో చురుకైన పాత్రను పోషిస్తానని అన్నారు.