Posted: 11/20/2012 10:59 AM IST

రాష్ట్ర పంచాయతీరాజ్ శాఖా మంత్రి కుందూరు జానారెడ్డిని నల్లగొండలో తెలంగాణవాదులు అడ్డుకున్నారు. జానారెడ్డిని సొంత పార్టీకే చెందిన ఎమ్మెల్యే కోమటిరెడ్డి వెంకట్‌రెడ్డి అనుచరులు తెలంగాణపై స్పష్టమైన వైఖరిని ప్రకటించాలని, పదవులకు రాజీనామా చేయాలని డిమాండ్ చేశారు. మంత్రి జానారెడ్డి ఇందిరాగాంధీ జయంతి సందర్భంగా పానగల్ వద్ద ఉన్న ఇందిరాగాంధీ విగ్రహానికి పూలమాలలు వేసేందుకు రాగా అప్పటికే అక్కడ ఉన్న కోమటిరెడ్డి వెంకట్‌రెడ్డి అనుచరులు తెలంగాణపై ఆయనను నిలదీశారు. ఓ వైపు మంత్రిని రాజీనామా చేయాలని కోరుతూనే కోమటిరెడ్డి జిందాబాద్ అంటూ నినాదా లు చేశారు. దీంతో మంత్రి జానారెడ్డి వెనుదిరిగి వాహనంలోనే కాసేపు కూర్చుని తిరిగి మరోసారి విగ్రహానికి పూలమాల వేసేందుకు ప్రయత్నించారు. అయినప్పటికీ ఆయనను కోమటిరెడ్డి అనుచరులు అడ్డుకోవటంతోపాటు వాగ్వివాదానికి దిగారు. దీంతో చేసేదేమీలేక మంత్రి మిర్యాలగూడకు బయలుదేరి వెళ్ళారు.