Posted: 10/15/2012 07:03 PM IST

ఇందిరాపార్కు వద్ద టీఆర్ఎస్, తెలంగాణ రాజకీయ జేఏసీ, తెలంగాణ నగారా సమితి ఆధ్వర్యంలో మహా ధర్నా నిర్వహిస్తామని టిఆర్ఎస్ ఎమ్మెల్యే హరీష్ రావు చెప్పారు. కాంగ్రెస్ మంచితనంగా తెలంగాణ ఇస్తే తీసుకుంటామని, లేకపోతే కేంద్రంలో, రాష్ట్రంలో నిర్ణయాత్మక శక్తిగా ఎదిగి కాంగ్రెస్‑ను పాతిపెట్టి తెలంగాణ తెచ్చుకుంటామని హెచ్చరించారు. తెలంగాణవాదుల నిరసన భయంతోనే బయోడైవర్సిటీకి వస్తున్న ప్రధాన మంత్రి మన్మోహన్ సింగ్‑ను ముఖ్యమంత్రి కిరణ్ కుమార్ రెడ్డి గాలిలో తిప్పాలని చూస్తున్నారన్నారు. ప్రధాని గాలిలో పోయినా తమ నిరసనలు తప్పవని హెచ్చరించారు. యూపీఏ ఎజెండాలో తెలంగాణ అంశం చేర్చి ఇంతవరకు ఎందుకు నిర్ణయం తీసుకోలేదని ఆయన ప్రశ్నించారు. డిసెంబర్ 9 ప్రకటనకు ఎందుకు కట్టుబడడం లేదని అడిగారు. కాంగ్రెస్ పార్టీ పూటకో మాట ఎందుకు మాట్లాడుతుందో కాంగ్రెస్ సమాధానం చెప్పాలన్నారు. అగ్రికల్చల్ యూనివర్సిటీ వైస్‑ఛాన్సలర్‑గా తెలంగాణ వ్యక్తినే నియమించాలని హరీష్ రావుతోపాటు పోచారం శ్రీనివాసరెడ్డి డిమాండ్ చేశారు. తెలంగాణ వ్యక్తి వీసీ కాకపోవడం వల్లే తమ ప్రాంతం వెనకబాటుకు గురవుతుందని వారరన్నారు.