Posted: 10/15/2012 06:51 PM IST

ఆధునిక భారతంలో ఓ అభినవ హరిశ్చంద్రుడి ఉందతమిది. కాసుల కోసం కక్కుర్తిపడి కట్టుకున్న దాన్నే అమ్మకానికి పెట్టాడో ప్రబుద్ధుడు. ఓ దుర్మార్గపు భర్త సొమ్ముల కోసం సహచరిని బేరం పెట్టాడు. కట్టుకున్నదన్న కనికరం కూడా లేకుండా వదిలించుకోవాలని కుట్ర పన్నాడు. పన్నాగం బెడిసికొట్టడంతో కాలికి బుద్ధిచెప్పాడు. పత్తా లేకుండా పరారయ్యాడు. కరీంగనర్ జిల్లా చందుర్తి మండలం మల్యాలకు చెందిన రాజేందర్, అమ్మాయి భార్యాభర్తలు. వీరికి ముగ్గురు కొడుకులు. తాగుడుకు బానిసయిన రాజేందర్ పూటుగా తాగొచ్చి అమ్మాయిని నిత్యం వేధించాడు. విచక్షణారహితంగా చిత్రహింసలు పెట్టేవాడు. పుస్తె కట్టినోడు కసాయోడయినా కాచుకోవాలన్న భారత సంప్రదాయాన్ని నమ్మిన మహిళ కాబట్టి రాజేందర్ పెట్టే బాధలను అమ్మాయి ఓర్చుకుంది. రోజురోజుకు రాజేందర్ రెచ్చిపోతున్నా సహించింది. కానీ దుర్మార్గుడు ఏకంగా ఆమెను అంగడి సరుకు చేయాలనుకున్నాడు.ఊరికి వెళుతున్నామని చెప్పి అమ్మాయిని బస్టాండ్‌కు తీసుకెళ్లాడు రాజేందర్. కోరుట్ల బస్టాండ్‌లో ఓ వ్యక్తి వచ్చి తీసుకెళతాడని చెప్పి బస్సెక్కించాడు. భర్త మాటలను అమాయకంగా నమ్మిన అమ్మాయి చివరికి కుట్ర గురించి తెలుసుకుని పోలీసులను ఆశ్రయించింది. డబ్బు కోసమే తనను అమ్మేశాడని కన్నీళ్లు పెట్టుకుంది. తనకు, తన బిడ్డలకు రక్షణ కల్పించాలని వేడుకుంది. భర్త ఏంచేస్తాడోనన్న భయంతో ఆమె వణికిపోతోంది. కట్టుకున్న భార్యను అమ్మకానికి పెట్టిన కఠినాత్ముడిని పట్టుకుని కఠినంగా శిక్షించాలని మానవతావాదులు కోరుతున్నారు.