Posted: 08/29/2012 11:20 AM IST

పేద, మధ్యతరగతి ప్రజల నుంచి మనీ స్కీమ్ ల పేరుతో కోట్లాది రూపాయలు వసూలుచేసి మోసం చేసిన ఉదంతాలు వెలుగు చూస్తుండగా తాజాగా కర్నూలు జిల్లాలో అలాంటిదే మరొకటి బయటికొచ్చింది. కర్నూలు జిల్లాలో మనీ సర్క్యులేషన్ స్కీమ్ పేరుతో ఎస్‑ఎస్‑వీఎస్‑ఎస్ సంస్థ ప్రజలకు రూ.కోట్లలో కుచ్చుటోపీ పెట్టింది. మద్దికెర మండలం అగ్రహారంలో రంగస్వామి అనే వ్యక్తి ఏడాది కాలంలో రూ.నాలుగు వేలు చెల్లిస్తే రూ.7వేలు చెల్లిస్తామని ప్రచారం చేసి ప్రజల నుంచి పెద్ద ఎత్తున వసూలు చేశాడు. గత ఎనిమిది నెలలుగా కర్ణాటకతో పాటు మన రాష్ట్రంలోని నాలుగు జిల్లాల్లో సుమారు 25వేల మంది ఈ సంస్థలో పొదుపు చేశారు. అంతే కాకుండా 32 శాతం వడ్డీ ఇస్తామని ఆశ చూపటంతో ...గడిచిన నాలుగు నెలల్లో మద్దికెర సిండికేట్ బ్యాంక్‑లో మహిళలు సుమారు 70 కేజీల బంగారాన్ని కుదవపెట్టి మరీ ఈ స్కీమ్ కట్టారు. అయితే రంగస్వామి డబ్బులు సక్రమంగా చెల్లించకపోవటంతో కొంతమంది బాధితులు పోలీసులను ఆశ్రయించారు. దాంతో వారు రంగస్వామిపై కేసు నమోదు చేశారు. అరెస్ట్ చేసేందుకు వెళ్లిన పోలీసులను గ్రామస్తులు అడ్డుకున్నారు. దాంతో రంగస్వామి మోసాలపై పోలీసులు ప్రజలకు అవగాహన కార్యక్రమాన్ని ఏర్పాటు చేశారు. బాధితుల ఆందోళన నేపథ్యంలో పోలీసులు భారీగా మోహరించారు.