Posted: 07/15/2012 12:40 PM IST

వైయస్సార్ కాంగ్రెస్ పార్టీ అధ్యక్షుడు, కడప పార్లమెంటు సభ్యుడు అయిన వైయస్ జగన్ మోహన్ రెడ్డి చంచల్ గూడ జైలులో అక్రమాస్తుల కేసుకు సంబంధించి ఈడీ విచారణ ఎదుర్కొంటున్న విషయం తెలిసిందే. ఈడీ అధికారులు జగన్ ని చంచల్ గూడ జైలులో రెండో రోజు ఆరు గంటల పాటు విచారించారు. ఈ విచారణలో ఈడీ అధికారులు భారతి సిమెంటుకి సంబంధించిన అంశం పై ప్రశ్నలు సంధించారు.

భారతీ సిమెంట్ లోని ఫ్రెంచ్ కంపెనీ ఒకటి 51 శాతం పెట్టుబడులు పెట్టినప్పటికీ యాజమాన్య హక్కులు మీకే ఎందుకు అప్పగించారని ఈడి అధికారులు జగన్‌ను ప్రశ్నించినట్లుగా తెలుస్తోంది. ఈ ప్రశ్నతో కంగుతిన్న జగన్ కి చెమటలు పట్టాయని అంటున్నారు. తన తండ్రి ముఖ్యమంత్రిగా ఉన్నప్పుడు సిమెంట్ కంపెనీలలోకి అక్రమంగా పెట్టుబడులు వచ్చినట్లుగా ఈడి అనుమానాలు వ్యక్తం చేస్తోంది. మేళ్లు పొందిన వారే అందులో పెట్టుబడులు పెట్టి ఉంటారని భావిస్తోంది. సొమ్మును విదేశాలకు తరలించి అక్కడి నుంచి తన సంస్థల్లోకి పెట్టుబడులుగా తీసుకొచ్చిన వైనంపై ఈడీ ఫెమా, మనీల్యాండరింగ్ చట్టాల కింద కేసులు నమోదు చేసింది. ఈ విచారణలో ముందు ముందు మరిన్ని నిజాలు బయటికి వస్తాయని అధికారులు అంటున్నారు.