Posted: 05/20/2012 12:49 PM IST

      ప్రస్తుత కాలంలో సోషల్ నెట్ వర్కింగ్ వెబ్ సైట్ ఫేస్ బుక్ హవా ఏపాటిదో మనకు తెలుసు. ఈ సంస్థ  వ్యవస్థాపకుడు మార్క్ జుకర్ బర్గ్(28) ఓ ఇంటివాడయ్యాడు. తన చిరకాల స్నేహితురాలు ప్రిస్ సిల్లా చాన్(27)ను శనివారం వివాహమాడారు. కాలిఫోర్నియాలోని తన నివాసంలో వీరి పెళ్లి జరిగింది. ఈ విషయాన్ని జుకర్ బర్గ్ తన పేస్ బుక్ పేజీలో వెల్లడించారు. పెళ్లి ఫోటోను కూడా అప్ డేట్ చేశారు.
ఈ పెళ్లి పొటోను మొదటి అరగంటలోనే 1,31,000 మంది నెటిజన్లు వీక్షించడం విశేషం. జుకర్ బర్గ్ ముదురు నీలం రంగు సూటు, తెల్ల చొక్కా, టై ధరించగా, చాన్ స్లీవ్ లెస్ లేసెడ్ తెల్లటి పెళ్లి గౌనులో మెరిసింది. హార్వర్డ్ వర్సిటీలో పరిచయమైన వీరు గత తొమ్మిదేళ్లుగా కలిసుంటున్నారు. ఫేస్ బుక్ ఐపీఓకు వెళ్లిన తర్వాత రోజే జుకర్ బర్గ్ పెళ్లి చేసుకోవడం గమనార్హం. ఇదే వారంలో శాన్ ఫ్రాన్సిస్కోలోని కాలిఫోర్నియా యూనివర్సిటీ నుంచి చాన్ మెడిసిన్ లో గ్రాడ్యయేషన్ పట్టా అందుకున్నారు. చాన్ వైద్య పట్టా అందుకున్న రోజున జుకర్ బర్గ్ తన పేస్ బుక్ పేజీలో 'నిన్ను చూసి గర్విస్తున్నాను డాక్టర్ చాన్' అంటూ సందేశం పోస్ట్ చేశారు. మరోవైపు పెళ్లైన వెంటనే ఫేస్ బుక్ లో తమ మ్యారేజ్ స్టేటస్ ను జుకర్ బర్గ్, చాన్ అప్ డేట్ చేశారు. వీరికి ప్రపంచ వ్యాప్తంగా శుభాకాంక్షలు వచ్చిపడుతున్నాయి.

...avnk