Posted: 02/27/2012 04:57 PM IST

ఖండేల్ వాల్ కమిటీ సిఫారసులను నిరసిస్తూ రేపు ప్రభుత్వరంగ బ్యాంక్ ఉద్యోగులు సమ్మెలో పాల్గొంటున్నారు. కేంద్ర ప్రభుత్వం నియమించగా బ్యాంక్ వ్యవహారాలను పరిశీలించి వివిధ సంస్కరణలను ప్రతిపాదించిన ఖండేల్ వాల్ కమిటీ సూచనలతో పాటు ఔట్ సోర్సింగ్ విధానాన్ని కూడా బ్యాంక్ ఉద్యోగ సంఘాలు వ్యతిరేకిస్తున్నాయి.

ఈ సమ్మెను విరమించుకోవాలని కేంద్ర ప్రభుత్వం పిలుపునిచ్చింది. అదంతా లాంఛనంగా ప్రభుత్వం చేసే ప్రకటనే కానీ సర్కారు చిత్తశుద్ధి ఇందులో కనపడటం లేదని కార్మిక సంఘలు అంటున్నాయి. ఎలాంటి సమస్యలున్నా చర్చించటానికి సిద్ధమని అంటున్న సర్కారుది చాలా ఆలస్యంగా తీసుకున్న నిర్ణయమన, ఆ మధ్య జరిగిన భారత కార్మిక సదస్సులో చర్చించే అవకాశం ఉన్నా ప్రభుత్వం అటువంటి ప్రయత్నాలేమీ చెయ్యలేదని, ఏఐటియుసి ప్రధాన కార్యదర్శి గురదాస్ దాస్ గుప్తా వ్యాఖ్యానించారు.

బ్యాంకింగ్ వ్యవహారాలు లావాదేవీల్లో దేశవ్యాప్తంగా ఉన్న ప్రభుత్వరంగ బ్యాంకుల 87 వేల శాఖల్లో నే 75 శాతం జరుగుతుంది కాబట్టి, భారతీయ స్టేట్ బ్యాంక్ తో పాటు ఇతర బ్యాంకులు కూడా వినియోగదారుల సాధారణ బ్యాంక్ సేవలకు రేపు అంతరాయం కలగవచ్చిని సూచించారు. 11 ప్రధాన కార్మిక సంఘాలు ఈ సమ్మెలో పాల్గొంటున్న తరుణంలో, సిఐటియు నాయకుడు దీపాంకర్ ముఖర్జీ మాట్లాడుతూ, కార్మికుల కష్టాలను గట్టెక్కించటంలో కార్మిక శాఖ విఫలమవటం వలన ఇది బలహీనమైన శాఖగా పరిగణించవలసి వస్తోందని అన్నారు.

రాష్టంలో చూసుకుంటే ఎక్కువగా ర్యాలీలతోనే ఆందోళన ముగిద్దామని టిఎన్జీవోలు నిర్ణయించగా, దేశవ్యాప్తంగా ముఖ్యంగా న్యూడిల్లీ, కోలకతా లలో బ్యాంక్ లే కాకుండా ప్రభుత్వరంగంలో పనిచేసే పాఠశాలలు, పోస్టల్ సేవలు, పోర్ట్, రవాణా మొదలైన శాఖలన్నిటిలోనూ దేశంలో మొదటిసారిగా కాంగ్రెస్, భాజపా, వామపక్షాలు, ఇలా వివిధ పార్టీలకు చెందిన కార్మిక సంఘాలు కలిసి సమ్మె చెయ్యబోతున్నారు.

-శ్రీజ