Posted: 02/16/2012 06:37 PM IST

చేపల వేటకు వెళ్ళినవాళ్ళని చూసి సముద్రపు దొంగలనుకుని కాల్చి చంపారట. కేరళ లో కోల్లమ్ సముద్ర తీరంలో బోట్ లో ఉన్న 11 మంది మత్స్యకారులను చూసి ఇటలీకి చెందిన ఎన్రికా లెక్సీ అనే వ్యాపార నౌక లోని భద్రతా దళాలు వాళ్ళ మీద కాల్పులు జరపగా వారిలో ఇద్దరు మత్స్యకారులు, బోట్ డ్రైవర్ మరణించారు.

ఈ సంఘటనను నిరసిస్తూ న్యూఢిల్లీలో విదేశాంగ శాఖ సెక్రటరీ ఎమ్ గణపతి, ఇటలీ దేశపు అంబాసిడర్ ని పిలిపించారు. అంబాసిడర్ జియాకోమో అందుకు వివరణనిస్తూ, వారి దేశపు నేవీ వారు అంతర్జాతీయ ప్రోటోకాల్ ని అనుసరించారని చెప్పారు. మీడియా తో మాట్లాడుతూ, ఈ సంఘటన చాలా దురదృష్టకరమని, అయితే అంతర్జాతీయ నియమాల ప్రకారం తమ ఓడ దగ్గరకు వస్తున్న బోటుని ఆగమని దీపాలతో సంకేతమిచ్చినా ఆగలేదని, అందువలన నేవీ వారు నియమాల ననుసరించే ప్రవర్తించారని అన్నారు.

ఇటలీకి సంబంధించిన ఓడ కోచి ఓడరేవులో లంగర్ వేసివుంది. పోలీసులు ఆ ఓడలోనే వారిని ప్రశ్నిస్తున్నారు.

11 మంది ఉన్న ఆ బోటులో ఆ సమయంలో 9 మంది నిద్రలో ఉన్నారని, వాళ్ళు చెప్తున్నట్టుగా ఎటువంటి హెచ్చరికలూ చెయ్యలేదని అంటున్నారు. చనిపోయిన మత్స్యకారులు తమిళనాడుకి చెందినవారైనా చాలా సంవత్సరాలుగా కేరళలో ఉంటూ వస్తున్నారు కనుక కేరళ ప్రభుత్వం వారి కుటుంబానికి 5 లక్షల రూపాయలు చొప్పున పరిహారం ప్రకటించింది. తక్షణ చర్యగా ఆ ఇద్దరి కుటుంబాలకూ కుటుంబానికి 10000 రూపాయల చొప్పున ఆర్థిక సహాయం అందివ్వటానికి జిల్లా అధికారి ముందుకొచ్చారు.

-శ్రీజ