Posted: 02/15/2012 10:43 AM IST

శాసన సభ ప్రారంభమవుతూనే ఈరోజు మళ్ళీ వాయిదా పడింది. ఈరోజు జరగాల్సిన గవర్నర్ ప్రసంగానికి ధన్యవాదాలు తెలిపే తీర్మానం మొదలవకుండానే తెదేపా తెరాసలు పోడియం దగ్గరకు చేరుకుని నినదించటంతో సభ అరగంట సేపు వాయిదా పడింది. మద్యం సిండికేట్ల మీద చర్చ జరగాలని, మద్యం సిండికేట్ల ముడుపులలో పాత్రలున్న మంత్రులను తొలగించాలని తెదేపా పట్టుబడుతోంది. మద్యం సిండికేట్లే కాదు మరే విషయంలోనైనా చర్చలకు సిద్ధమేనని మంత్రి శ్రీధరబాబు ప్రకటించారు అయినా పరిస్థితి సద్దుమణగకపోయేసరికి సభను వాయిదా వెయ్యటం జరిగింది.

శాసనసభ సజావుగా జరగటానికి సభాపతి ఫ్లోర్ లీడర్ల సమావేశాన్ని పిలిచారు. అయితే తెదేపా దాన్ని బహిష్కరించింది. సిపిఐ, సిపిఎమ్, లోక్ సత్తా, భాజపా, తెరాస నాయకులు ఆ సమావేశానికి హాజరయ్యారు కానీ భూకేటాయింపుల మీద సభాసంఘాన్ని నియమించటంలో తమకు సంఖ్యా ప్రాబల్యం దక్కలేదని తెదేపా ఆరోపించింది. ఈ విధమైన సభాపతి తీరుని నిరసిస్తూనే ఫ్లోర్ కమిటీ మీటింగ్ ని బహిష్కరించామని తెదేపా చెప్తోంది. చివరకు భూకేటాయింపుల మీద నియామకమైన సభాసంఘం రద్దయ్యే సూచనలు కనిపిస్తున్నాయి. సభాపతి దానిమీద నిర్ణయం తీసుకోవటానికి సిద్ధమవుతున్నట్టుగా తెలుస్తోంది.

తెదేపాతో చర్చించిన తర్వాతనే సభాసంఘాన్ని వేసామని, అందులో ఏమైనా మార్పులు చేర్పులు చెయ్యాలంటే, ఏ విధమైన అభ్యంతరాలైనా ఉంటే ఫ్లోర్ లీడర్స్ మీటింగ్ లో పాల్గొని చర్చించాలి కానీ బహిష్కరిస్తే ఎలా అని సభాపతి అంటున్నారు.

మొత్తానికి శాసన సభలో చర్చలు తక్కువ, పరస్పరారోపణలు ఎక్కువ చోటు చేసుకుంటున్నాయి.

-శ్రీజ