Posted: 02/11/2012 11:10 AM IST

ముఖ్యమంత్రి, రాష్ట్ర మంత్రులు, ఇలాంటి ప్రముఖులు, పెద్దలు పర్యటించటం వలన ఆయా ప్రాంతాలకు మేలు జరుగుతుందన్నది నిర్వివాదం. చిన్న గ్రామాల్లోనైతే వారు పర్యటించే దారులన్నీ మరమ్మతులకు నోచుకోవటం, వారు సందర్శించే ప్రదేశాలన్నీ రంగులు పూసుకోవటం, ఆ తర్వాత వారు వచ్చినందుకు ఏదైనా అభివృద్ధి కోసం నిధులను కేటాయించటం లాంటివి జరుగుతుంటాయి. సామాన్యంగా వారు అక్కడి వారి బాగోగులు అడిగినప్పుడు, అంతా బాగానేవుంది మాకేమీ వద్దని ఎవరూ అనరు. ఏదో ఒకటి కావలసేవుంటుంది. అలాంటివి ఈ ప్రముఖులు తీర్చటం వలన అక్కడ ఎంతో లాభం చేకూరుతుంది. ఇది గ్రామాలకే పరిమితం కాలేదు. నగరాల్లో కూడా జరుగుతుంటాయి.

ఈరోజు తిరుపతిలో ప్రభుత్వ ప్రసూతి హాస్పిటల్ లో ఆకస్మిక తనిఖీ నిర్వహించిన ముఖ్యమంత్రి కిరణ్ కుమార్ రెడ్డి, వార్డులలో తిరిగుతూ రోగులను పలకరిస్తూ, వారికి అందుతున్న వైద్య సేవల విషయం అడిగి తెలుసుకున్నారు. అక్కడి పరిస్థితిని అర్థం చేసుకున్న ముఖ్యమంత్రి ప్రస్తుతమున్న 140 పడకలను 300 కి పెంచటానికి, హాస్పిటల్ కి ఒక ఓపి బ్లాక్, రెండు అనస్తీషియా యూనిట్లను ఏర్పాటు చెయ్యటానికి చర్యలు తీసుకుంటామన్నారు. దానితో పాటు మెరుగైన వైద్యసేవలను అందించటానికి అదనంగా కొందరు వైద్యులను నియమిస్తానని కూడా ఆయన మాటిచ్చారు. తిరుపతిలో పర్యటిస్తున్న ముఖ్యమంత్రితో పాటు మంత్రులు గల్లా అరుణ కుమారి, సి.రామచంద్రయ్య, ఎమ్మెల్యే చిరంజీవి కూడా ముఖ్యమంత్రితోపాటు ఈ కార్యక్రమంలో పాల్గొన్నారు.

-శ్రీజ