Posted: 02/09/2012 11:29 AM IST

ఎట్టకేలకు పోలవరం టెండర్లు రద్దయ్యాయి. అసలే రాజకీయ తలపోట్లు ఎక్కువౌతున్న సందర్భంలో స్యూ కంపెనీకి భారీ పనులను కట్టబెట్టటం మీద ఒకపక్క రాజకీయ ఒత్తిడి మరో పక్క టెండర్ దక్కని సోమ సంస్థ హైకోర్టుని ఆశ్రయించటం, ఈ నేపథ్యంలో ఒక తలపోటైనా తగ్గుతుందనుకుని ప్రభుత్వం టెండర్ల రద్దుకే ఓటేసింది.

తెరాస అధినేత కెసిఆర్ కి స్యూ కంపెనీకి మధ్య జై తెలంగాణా వార్తా పత్రికలో భాగస్వామ్యం ఉండటం, అదే కంపెనీకి పోలవరం టెండర్ దక్కి పెద్ద కాంట్రాక్ట్ లభించటం వెనుక ఉద్యమం చేస్తున్న తెరాసకి ప్రభుత్వం ఇచ్చిన తాయిలంగా పెద్దెత్తున్న దుమారం లేచింది. దీనిమీద కేంద్ర స్థాయిలో కూడా చర్చలు జరిగాయి. నిన్న రాష్ట్రంలో ప్రధాన కార్యదర్శి పంకజ్ ద్వివేది నేతృత్వంలో సమావేశమైన ఉన్నత స్థాయి కమిటీ, స్యూ కంపెనీకి అర్హతలు లేవు సరే కానీ అభియోగం చేస్తున్న సోమ కంపెనీకి కూడా ఆ కాంట్రాక్ట్ ఇవ్వటానికి తగిన సాంకేతిక, ఆర్థిక పరమైన అర్హతలు లేవని నిర్ణయించింది.

దానితో నీటిపారుదల శాఖ మరోసారి టెండర్లు పిలిచే పనిలో పడుతోంది. అయితే ప్రస్తుతం ఒకే విషయం ఇంకా తేలనిదేమిటంటే, టెండర్లను మూడు పనులకూ విడివిడిగా పిలవాలా లేక ఉమ్మడిగానా అన్నది. పోలవరం రాక్ ఫిల్ డ్యాం, స్పిల్ వే, విద్యుత్ బ్లాక్ ల పనులకు టెండర్లను విడదీయాలా లేక కలిపి ఒకటే టెండరా అన్నది ఇంకా నిర్ణయించుకోవలసివుంది.

-శ్రీజ