Posted: 02/09/2012 11:08 AM IST

అటుతిరిగి ఇటుతిరిగి మద్యం సిండికేట్ల మీద ఎసిబి చేసిన దాడుల్లో ఎక్సైజ్ శాఖామాత్యులు మోపిదేవి వెంకట రమణ పేరు బయటపడింది. ఆయనకు ముడిపులు అందినట్టుగా సిండికేట్ల రికార్డ్ లలో తేలింది. దానితో ప్రతిపక్షాల్లో కలకలం, పాలకపక్షంలో కలవరం చెలరేగింది.

తాను ఉన్నతమైన కుటుంబం నుంచి వచ్చానని, ఎంతో క్రమశిక్షణతో పెరిగానని ఇలాంటి చిల్లర పనులు చెయ్యవలసిన అవసరం తనకు లేదని, అసలు తనకు ముడుపులు చెల్లించానంటున్న మనిషెవరో కూడా తనకి తెలియదని మోపిదేవి మీడియా ముందు చెప్పుకొచ్చారు. తనమీద గనక ఆధారాలతో నేరారోపణ జరిగితే తాను వెంటనే రాజీనామా చేస్తానని ఆయన అన్నారు.

ఇదిలా ఉండగా తెలుగుదేశం పార్టీ ఆయన మీద ఆధారాలతో సహా నిందారోపణ చేసింది. 22 సంవత్సరాల మోపిదేవి కుమారుడు రాజీవ్ పోయిన సంవత్సరం క్రెడెన్స్ వెంచర్ కాపిటల్ పేరుతో భాగస్వామ్య సంస్థనోదాన్ని రిజిస్టర్ చేయించారు. నెల లోపులోనే ఆ సంస్థకు ఇన్ బేవ్ ఇంటర్నేషనల్ అనే సంస్థ బ్లాక్ ఈగల్ బీర్ ని మన రాష్ట్రంలో పంపిణీ చెయ్యటానికి హక్కులను ధారాదత్తం చేసింది. ఎంతో అనుభవమున్న సంస్థలెన్నో ఉన్నా మంత్రి కుమారుడికి ఈ పంపిణీ హక్కలు దక్కాయంటే అవి ముడుపులు కాక మరేమిటని తెదెపా నాయకులు ప్రశ్నిస్తున్నారు.  ప్రభుత్వం నుంచి పనులు చేయించుకోవటం, ఇలా దొడ్డిదారిన వ్యాపరంలో లాభాలు వచ్చేట్టుగా చెయ్యటం ఒకప్పుడు గుట్టు చప్పుడు కాకుండా జరిగేది కానీ ఇప్పుడది అందరికీ తెలిసిన విధానమైపోయింది.

తెదేపా ప్రధాన కార్యదర్శి వర్ల రామయ్య ఈ విషయంలో ప్రభుత్వ వైఖరిని తప్పు పడుతూ, ఎక్సైజ్ అధికారులకో న్యాయం, మంత్రులకో న్యాయమా అని ప్రశ్నిస్తున్నారు.

అయితే తెదేపా ఎమ్మెల్యే వెంకట వీరయ్య పేరు కూడా లంచాల జాబితాలోకి వచ్చిందని తెలిసి, ప్రతిపక్షంలో ఉన్నవాళ్ళకి లంచమెందుకిస్తారు, అయినా మేము పార్టీ పరంగా విచారణ చేసి తగు చర్య తీసుకుంటామని వర్ల రామయ్య అన్నారు.

-శ్రీజ