Posted: 01/11/2012 10:44 AM IST

ప్రభుత్వ కార్యాలయాలు కానీ ప్రైవేటు సంస్థలలో కానీ ఏదైనా పొరపాటు జరిగినప్పుడు ఎవరికి వారు అర్జెంటుగా చూసుకునేదేమిటంటే నా మీదకేమీ రాదు కదా అనే. ప్రమాదం జరిగినప్పుడు ముందుగా, ఇందులో నా తప్పేమీ లేదని చెప్పటానికి ప్రయత్నించటం, ఇతరుల పొరపాటైతే గట్టిగా ఖండించటం, అంటీ ముట్టనట్టుగా ప్రకటనలివ్వటం, బాధ్యతను మీద వేసుకోకపోవటం, ఈ అలవాట్ల నుంచి బయటపడ్డరోజునే దేశంలో కార్యకలాపాలు, ముఖ్యంగా భద్రత పటిష్టంగా ఉంటుంది, పారదర్శకత పెరుగుతుంది.

దిబ్రుగఢ్ నుంచి వస్తున్న బ్రహ్మపుత్ర మెయిల్ న్యూఢిల్లీ వెళ్తుండగా, బర్హార్వా-సాహెబ్ గంజ్ మార్గంలో కరన్ పురాటో రైల్వే స్టేషన్ దగ్గర గూడ్స్ ని ఢీకొంది. ఉదయం 5.30 కి జరిగిన ఈ ఘటనలో ఇద్దరు ప్రయాణీకులు మృతిచెందారని, నలుగురు గాయపడ్డారని, స్లీపర్ క్లాస్ లోని ఒక మనిషి ఇరుక్కుపోయాడని తూర్పు రైల్వే సిపిఆర్ వో సమీర్ గోస్వామి తెలియజేసారు. 7.10 కి చేరుకున్న సహాయక బృందం సహాయక కార్యక్రమాలను చేపట్టింది.

బ్రహ్మపుత్ర మెయిల్ లోని ఒక బోగీ పట్టాలు తప్పి, నిలిచివున్న గూడ్స్ బండిని ఢీకొన్నదని, ఈ ప్రమాదంలో నలుగురు మరిణించారు, ఐదుగురు గాయపడ్డారని, రైల్వే పోలీసు సూపరింటెండెంట్ తెలియజేసారు. కోలకతాలోని రైల్వే ప్రధాన కార్యాలయంలోని స్పోక్స్ మన్ మాట్లాడుతూ, ఒక ఐదుగురికి చిన్న చిన్న గాయాలయ్యాయని ప్రకటించారు.

ప్రమాదం జరిగిందనైతే అందరూ ఒప్పుకున్నారు కానీ భిన్నమైన వివరాలను తెలియజేసారు. ఇక ప్రమాదానికి కారణాల విషయంలో నైనా ఏకాభిప్రాయానికి వస్తారేమో చూడాలి.

-శ్రీజ