Posted: 12/27/2011 03:26 PM IST

విశాఖ, సీమాంధ్రలో సహస్ర తులసీ శ్రీనివాసం ఆధ్యాత్మిక కార్యక్రమాలు ముగిసిన తర్వాత త్రిదండి చిన జియ్యర్ స్వామి ఆధ్వర్యంలో మహబూబ్ నగర్ జిల్లా గద్వాల్ లో జనవరి 2 నుంచి 4 వరకు కొనసాగనుంది. చివరిగా రాయలసీమలో ప్రొద్దుటూరు వేదికగా ముగియనున్న ఈ కార్యక్రమాలకు ప్రభుత్వం తరఫునుంచి సహకారం లభిస్తుందని సమాచార శాఖా మంత్రి డికే అరుణ వాగ్దానం చేసారు. ముచ్చింతల్ దగ్గర జియ్యర్ స్వామి ఆశీస్సులను పొందిన మంత్రి అరుణ, ఆధ్యాత్మిక కార్యక్రమాలతోపాటు సమాజాభివృద్ధికి కూడా కృషి చేస్తున్నారని ప్రశంసించారు.

అసలు రామానుజుల వైష్ణవ సాంప్రదాయమే ఒక పెద్ద ఆధ్యాత్మిక విప్లవం. అంతకు ముందు వరకూ కేవలం జన్మతోనే ఆచారవ్యవహారాలను పాటించే అగ్ర కులాలుగా పరిగణించబడతారన్న వాదనను తోసిపుచ్చి, ఏ కులమైనా వైష్ణావాన్ని తీసుకోవచ్చని, అందులో పాటించవలసిన విధి విధానాలలో శిక్షణనిస్తూ, అప్పట్లోనే రామానుజాచార్యులవారు హిందుత్వంలోనే పెద్ద విప్లవాన్ని తీసుకొచ్చారు. చిన్న వయసులోనే రామానుజులు గురువుగారు తనకి రహస్యంగా ఉపదేశించిన మంత్రాన్ని ఆలయ గోపురమెక్కి గట్టిగా అందరికీ వినిపించేట్టుగా చదివారట. అందుకు ఆయన గురువుగారు ఆగ్రహించగా, నేనేమైనా పరవాలేదు కానీ ఈ మంత్రం ఎంతో మేలు చేస్తుందని చెప్పారుగా అందుకే అందరికీ ఉపయోగపడాలని అలా చేసానన్న ఆధ్యాత్మిక విప్లవకారుడు రామానుజాచార్యుల గురుపరంపరలో ఎన్నో వైష్ణవ పీఠాలు వెలిసాయి. అందులో ఒక పీఠమే చిన్న జియ్యర్ స్వామి ఆధ్వర్యంలో దేశ విదేశాల్లో ఖ్యాతిగడించిన వైష్ణవ పీఠం.

భక్తిని పెంచుతూ, అందరూ పఠించగలరు అన్న నమ్మకాన్ని పెంపొందిస్తూ, అందరిచేతా విష్ణు సహస్ర నామాలు, భగవద్గీత శ్లోకాలు చదివిస్తూ, అందులో పోటీలు పెడుతూ చేపట్టిన కార్యక్రమాల వలన హిందూ సాంప్రదాయం మీద అందరికీ ఆసక్తి పెరగటమే కాకుండా, కుల వివక్షలు పోవటానికి కూడా దోహదం చేస్తోంది. ఏ కులంలో జన్మించినా వైష్ణవం తీసుకున్న తర్వాత వైష్ణవులే. ఈ విధంగా సమాజంలోని అంతరాలు అంతరించటమే కాకుండా, హిందూ మతం లోంచి ఇతర మతాల్లోకి పోతున్నవారికి ఆనకట్ట వేసి హిందుత్వంలో నిలిచిపోయేట్టుగా కూడా పరోక్షంగా పాటుపడుతోంది.

-శ్రీజ