Posted: 12/27/2011 02:49 PM IST

దీక్షకు పూనుకున్న అన్నా హజారే జ్వరంలో బాధపడుతున్నారు. వైద్యబృందం అప్రమత్తంగా ఉంది. కానీ అన్నా బృందంలోని కిరణ్ బేడీ మాత్రం అన్నా వయసుని దృష్టిలో పెట్టుకుని, ఆందోళన కొనసాగిద్దాం కానీ దీక్ష విరమించమని కోరారు.

లోక్ సభలో పాలకపక్ష విపక్షాల మధ్య లోక్ పాల్ మీద చర్చలు వాడిగా సాగుతున్నాయి. దేశమంతా అవినీతిని ఎదుర్కునే లోక్ పాల్ కోసం ఎదురు చూస్తున్నదని, ప్రతిపక్షాలు వారి ఆశలను అడియాసలు చెయ్యవద్దని కేంద్ర మంత్రి కపిల్ సిబాల్ కోరుతూ, రాజ్యాంగంలోని ఆర్టికిల్ 253 పరిధిలో సామాన్యుడికి కూడా న్యాయం జరగాలంటే లోకోయుక్త అవసరం చాలా ఉందని, రాష్ట్రాలను మినహాయించమనటం సమంజసం కాదని అంటూ కపిల్ సిబాల్, భాజపా ప్రభుత్వంలో కర్నాటకలో జరిగిన అవినీతి గురించిన ప్రస్తావన తీసుకునివచ్చారు. రాజ్యాంగానికి ఆవల ఉండేవిధంగానూ, జవాబుదారీ లేకుండానూ లోక్ పాల్ ఉండాలని ప్రభుత్వం కోరుకోవటం లేదని, ప్రతిపక్షం సహకరించకపోతే లోక్ పాల్ రావటం కష్టమౌతుందని ఆయన హెచ్చరించారు.

అన్నా నత్తిడికి లొంగి లోక్ పాల్ ప్రవేశపెట్టినా, ప్రతిపక్షం వలనే ఆది పాసవలేదనే ఆరోపణ చెయ్యటానికి ప్రభుత్వం సిద్ధంగా ఉంది జాగ్రత్త అని పార్లమెంటు సమావేశాలు మొదలవకముందే కిరణ్ బేడీ ఎంపీలందరినీ హెచ్చరించారు. నెపమంతా మీ మీదకు తొసెయ్యబడుతుంది చూసుకోండి అని ఆమె చెప్పినట్టుగానే లోక్ సభలో ప్రస్తుత చర్చలు సాగుతున్నాయి.

-శ్రీజ