Anna Warns Pm And Mps Before Goes On Deeksha

Posted: 12/26/2011 10:35 AM IST

anna-hazare సామాజిక వేత్త, అవినీతికి వ్యతిరేకంగా పోరాటంలో భాగంగా లోక్ పాల్ బిల్లు కోసం నడుం బిగించిన అన్నా హజారే ప్రధానమంత్రికి, ఎంపీలందరికీ 27 నుంచి తాను చెయ్యదలచుకున్న దీక్షకు ముందుగా మరో లేఖను పంపించారు. సిబిఐ ని లోక్ పాల్ లోకి చేర్చవలసిందేనంటూ పట్టుబడుతూ, లోక్ పాల్ కి సుమోటో అధికారాలుండాలని ఆయన తెలియజేసారు. అంతేకాకుండా నిందితుడు అన్నీ సర్దుకునేందుకు అవకాశమిస్తూ ఎఫ్ఐఆర్ నమోదు చెయ్యటం, ప్రాథమిక విచారణకు ఆదేశించటంలాంటివేమీ ఉండగూడదని, ప్రభుత్వోద్యోగుల్లో సి, డి కేటెగరీ లోని ఉద్యోగులను నేరుగా విచారణ చేసే అవకాశముండాలని ఆయన సూచించారు.

అంతేకాకుండా లోక్ పాల్ నియామక విధానాన్ని కూడా బిల్లులో స్పష్టంగా సూచించాలని ఆయన అన్నారు. ప్రధానమంత్రి, ప్రతిపక్షనాయకుడు, సుప్రీంకోర్టు ఎంపిక చేసిన ఇద్దరు జడ్జీలు, కాగ్, కేంద్రవిజిలెన్స్, ఎన్నికల కమిషనర్ తో కూడిన కమిటీ లోక్ పాల్ ని నియమించ వలసి వుంటుందని చెప్తూ అన్నా హజారే, ఈ విషయాన్ని ఇప్పుడే స్పష్టంగా బిల్లులో పేర్కొంటూ దాన్ని చర్చలోకి తీసుకుని రావాలని ఆ లేఖలో రాసారు.

డిసెంబరు 27 నుంచి వరుసగా మూడు రోజులు దీక్ష చేసిన అనంతరం అన్నా సోనియా గాంధీ, రాహుల్ గాంధీ నివాసాల దగ్గర ఆందోళన సాగిస్తానని, జైల్ భరో కార్యక్రమంలో తను ముందుండి నడిపిస్తానని కూడా ఆయన తన లేఖలో మరోసారి హెచ్చరించారు.

అయితే, అన్నా ఆర్ఎస్ఎస్ ఏజెంటని కొత్తగా కాంగ్రెస్ మంత్రి వర్గంలో చోటు సంపాదించుకున్న దిగ్విజయ్ సింగ్ ఆరోపిస్తూ, అందుకు సాక్ష్యాధారాలుగా ఫొటోలను ట్విట్టర్ లో పోస్ట్ చేసారు. 1983లో ఆయన ఆర్ఎస్ఎస్ లో కార్యదర్శిగా పనిచేసారని, గోండా ప్రాంతంలో శిక్షణ కూడా తీసుకున్నారని దిగ్విజయ్ సింగ్ ఆరోపణ. అయితే దానివలన అన్నా అవినీతిని ఎదుర్కోవటానికి ఏవిధంగా అనర్హులో ఆయన చెప్పలేదు. పాతనేరచరిత ఉన్నవాడు కోర్టులో సాక్ష్యానికి పనికిరాడని ఇంపీచ్ చేసినట్టు అవినీతి గురించి కదమెత్తటానికి అన్నా అనర్హుడని చెప్పటానికి దిగ్విజయ్ ప్రయత్నం చేసారు.

-శ్రీజ