Posted: 12/19/2011 11:15 AM IST

16 మంది కాంగ్రెస్ శాసన సభ్యుల మీదా ఒకేసారి అనర్హత వేటు వేసి, ఒకేసారి ఉప ఎన్నికలకు తెరతీయాలని కాంగ్రెస్ పార్టీ అభిప్రాయపడుతోంది.  అందుకు వేదిక సిద్ధం చేసి అభ్యర్థులను కూడా నిర్ణయం చేసినట్లయితే బావుంటుందన్న ఉద్దేశ్యంతో అనర్హత మీద సభాపతి జాప్యం చేస్తున్నట్టుగా సమాచారం.  ఈ 16 మందితో పాటు ప్రరాపా కి చెందిన శోభా నాగిరెడ్డి మీద కూడా అనర్హత పడవచ్చు.  దానితో 17 చోట్ల ఒకేసారి ఉప ఎన్నికలు జరిగే అవకాశం ఉన్నందువలన అన్ని పార్టీలూ తమ తమ వ్యహాల్లో మునిగితేలుతున్నాయి. 

కాంగ్రెస్ పార్టీకి చెందిన 16 మంది శాసన సభ్యుల మీదా పార్టీ అధినేత్రి సోనియా గాంధీకి నివేదికనిస్తూ, వారంతా అలా పార్టీకి వ్యతిరేకంగా పనిచేయటంలో తమ వైఫల్యమూ ఉందని తెలియజేసారు.  శాసన సభ్యులను తమ పార్టీలో ఉంచుకోవటంలో తామే విఫలమయ్యామని రాష్ట్ర కాంగ్రెస్ పార్టీ నుంచి నివేదిక వెళ్ళటం విశేషం.  అనర్హతల తీర్పు ఇచ్చేముందు కావలసినంత సమయం తీసుకోవచ్చు.  దానికి కాలపరిమితేమీ లేదని అంటున్నారు.  వెంటనే ఆ నిర్ణయం తీసుకోవచ్చు, లేదా అభ్యర్థులను పిలిచి వారి వైపు కథనాన్ని కూడా విని నిర్ణయం తీసుకోవచ్చు. 

ఈ వెసులుబాటులో, ఎన్నికలకు సిద్దమవాలా వద్దా అన్నది కూడా నిర్ణయించుకుంటే దాన్ని బట్టి ఇతర కార్యక్రమాలుంటాయి.  అంటే ఉప ఎన్నికలు జరగటమనేది సభాపతి నిర్ణయం మీద ఆధారపడి ఉంది కానీ, ఆ నిర్ణయం ఉప ఎన్నికలకు వెళ్ళాలా వద్దా, వెళ్తే ఎప్పుడు అన్న విషయంలో రాష్ట్ర ప్రభుత్వం ఇచ్చే నివేదకి మీద కేంద్ర ప్రభుత్వం తీసుకునే నిర్ణయం మీద ఆధారపడి ఉంది.  అందువలన దీనిమీద అభ్యర్థులకంటే ఎక్కువ కాంగ్రెస్ పార్టీలోనూ, ఇతర పార్టీల్లోనూ ఎక్కువ ఉత్కంఠ నెలకొనివుంది. 

-శ్రీజ