Posted: 12/19/2011 11:46 AM IST

చిరంజీవికి రాజకీయాల్లో సముచిత హోదానిస్తామని ఎప్పటి నుంచో వినవస్తున్నా దానికి వేదిక ఇప్పటికి సిద్ధమైనట్టుగా కనపడుతోంది. ఏప్రిల్ 2012 లో ఖాళీ అవుతున్న రాజ్యసభలోని 6 సీట్లలో ఒకటి చిరంజీవికి ఖాయమని విశ్వసనీయ వర్గాల నుండి సమాచారం అందింది.  ఈ విషయాన్ని అందించిన నాయకుడు, రెండు విషయాలను స్పష్టం చేసారు.  ఒకటి చిరంజీవి కేంద్ర ప్రభుత్వంలోనే స్థానాన్ని పొందటం, రెండవది, అది కూడా ఏప్రిల్ లోపులోనే మంత్రి వర్గం లోకి తీసుకుని రాజ్య సభకు సభ్యత్వాన్నివ్వటం.  ఇక రాష్ట్ర స్థాయిలో చిరంజీవికి స్థానం ఉంటుందన్నది పక్కకు పెట్టేయవచ్చు.  అయితే ప్రజారాజ్యం పార్టీలోని నాయకులకు రాష్ట్రంలో మంత్రి వర్గ విస్తరణ ద్వారా హోదాల్లోకి రావటానికి వేదికను కల్పిస్తారు.  వారు ఎవరన్నది ప్రరాప అధ్యక్షుడైన చిరంజీవి నిర్ణయానికే వదిలేస్తారని కూడా చెప్పటం జరిగింది.

ఏమైనా తెలుగువారిలో కేంద్రంలో కీలకమైన స్థానంలో ప్రస్తుతం ఎవరూ లేరు, అది ముఖ్యమని కూడా ఎవరూ భావిస్తున్నట్టుగా కానీ, అందుకు ప్రయత్నిస్తున్నట్టుగా కానీ లేదు.  దివంగత ప్రధానమంత్రి పివి నరసింహారావు తర్వాత ఢిల్లీ అధిష్టానంలో ఆంతరంగ వ్యవహారాల్లో తలదూర్చినవారెవరూ లేరు.  ఈ దిశలో వ్యూహాత్మకంగా వ్యవహరించిన చిరంజీవి ఆ ప్రయత్నంలో కృతకృత్యులైనట్లయితే తెలుగువారి ప్రాభవాన్ని కేంద్రంలో ప్రభావితం చేసే అవకాశం ఉంది.  అది తెలుగువారందరికీ గర్వకారణం అయ్యే రోజవుతుంది. 

-శ్రీజ