Posted: 12/16/2011 01:01 PM IST

"నేను చచ్చిపోయాను" అని చెప్తే మరీ దాన్ని నమ్మేవారుండరని, 'రహదారిలో ప్రమాదంలో రోడ్డు మీద పడి ఉన్నానని, కుడి చెయ్యి, కుడి కాలు బాగా దెబ్బ తిన్నాయని, రక్తం ఓడుతున్నానని, ఎవరో తన పర్సు కూడా కొట్టేసారని, సాయం చేసేవారు ఎవరూ కనుచూపుమేరలో కనపడటం లేదని' సచిన్ గోతి పేరు మీద ట్విట్టర్ నెట్ లో ప్రత్యక్షమైంది.  దానికి ముందు మూడుగంటలుగా స్పృహలో లేనని కూడా అందులో ఉంది.  ఇది చూసి, అయ్యో పాపం సాయం చేద్దామనుకుని రమేష్ సోలంకి అనే అతను గుజరాత్ పోలీసులకు ఈ విషయాన్ని రిపోర్ట్ చెయ్యగా, ట్వీట్ చేసిన మనిషి చెప్పిన ప్రకారం నేషనల్ హైవే 8 లో రాజ్కోట్ దగ్గర చూస్తే పోలీసులకు అటువంటి వారెవరూ దొరకలేదు. 

నాన్నా పులి కథని గుర్తుకి తెచ్చే ఈ సంఘటన అంతటితో ఆగలేదు.  మరో ట్విట్టర్ వచ్చింది.  సచిన్ గోతి తనను ఆంబ్ లెన్స్ లో ముంబై తీసుకెళ్ళారని, ఆరు చోట్ల ఎముకలు విరిగాయని, దానికి కట్లు, 32 కుట్లు పడ్డాయని దాని సారాంశం.  ఆంబులెన్స్ అక్కడికి పోయినమాట నిజమే కానీ అక్కడ ఎవరూ కనిపించక ఖాళీగా వెనక్కి రావటం జరిగింది. అప్పడు వచ్చింది అనుమానం.  అంత రద్దీగా ఉండే జాతీయ రహదారిలో ప్రమాదం జరిగితే ఎవరూ కనిపెట్టకపోవటం, పట్టించుకోకపోవటం జరగదు.  పైగ ఆరు చోట్ల ఎముకలు విరిగి, 32 కుట్లు పడ్డవాడు ఓపిగ్గా ట్విట్టర్లో ఆ విషయాన్ని టైపు చేస్తాడా? 

బాధ్యతారాహిత్యంతో చేసే ఇటువంటి సంఘటనలు జరిగితే, నిజంగా ఆపదల్లో ఉన్నవారినెవరైనా పట్టించుకుంటారా?  సచిన్ గోతి అని పేరు పెట్టుకుని ట్వీట్ చేసిన మనిషికే ఎప్పుడైనా ప్రమాదం జరగవచ్చు.  అతను నిజంగానే సాయం కావలసి ట్వీట్ చేస్తే, అప్పుడు అతని సాయానికి రాక, సచిన్ గోతి ని, "సచ్చినోడా గోతిలో సచ్చినోడా!" అని తిట్టుకుని వదిలేస్తారు!  

-శ్రీజ