Posted: 11/28/2011 04:25 PM IST

     లోక్ పాల్ బిల్లయితే పార్లమెంటులో ప్రవేశపెట్టటం జరుగుతుంది కానీ అది అన్నా హజారే బృందం రూపొందించిన ముసాయిదాకి ఎంత దగ్గర్లో ఉంటుందన్నదే ప్రశ్నార్థకం.   అన్నిటికన్నా ముఖ్యంగా లోక్ పాల్ పరిధిలో ప్రధాన మంత్రి, న్యాయ వ్యవస్థ, సిబిఐ కూడా ఉండాలని అన్నా కోరుకుంటున్నారు. మంత్రుల వరకూ ఓకే కానీ ప్రధాన మంత్రి కూడా అనేటప్పటికి పాలకవర్గంలో కాస్త వెనకా ముందూ అవుతున్నారు. ఈ విషయం మీద చర్చలు ముగించి ఒక వారం లోగా నిర్ణయానికి వస్తామని పార్లమెంట్ కమిటీ చైర్మన్ అభిషేక్ సింఘ్వీ ప్రకటించారు. ఈ విషయంలో సభ్యులంతా రెండు దిశల్లో ఆలోచిస్తున్నారని ఆయన అన్నారు. కాంగ్రెస్ సభ్యులంతా ప్రభుత్వం ప్రతిపాదించిన ముసాయిదాను సమర్థిస్తున్నారని సింఘ్వి అన్నారు. ఏది ఏమైనా డిసెంబర్ 7 కల్లా కమిటీ ఈ విషయంలో నివేదికను సమర్పిస్తుందని, ఈ సమావేశాల్లోనే లోక్ పాల్ బిల్లు ప్రవేశపెట్టటం జరుగుతుందని అభిషేక్ సింఘ్వీ హామీ ఇచ్చారు. పాలకులు వేసే ప్రతి అడుగూ ముందే తెలుసన్నట్టుగా అన్నా హజారే సాగతీతకు వీల్లేకుండా ఇదే శీతాకాలం సమావేశాల్లో పెట్టాలని పట్టుబడుతున్నారు. అలా జరగని పక్షంలో మరోసారి దీక్షకు సిద్ధమని చెప్పటమే కాకుండా అందుకు కావలసిన అనుమతులు కూడా తీసుకుంటూ రంగం సిద్ధం చేస్తున్నారు. అన్నా మీద, ఆయన బృందంలో సభ్యుల మీదా విచారణలు, ఆరోపణలు, దాడులు వస్తున్నా చలించకుండా తన పని తాను చేసుకుంటూ ఒకే లక్ష్యంతో ముందుకెళ్తున్న అన్నా హజరే ప్రయత్నం ఎంత వరకూ ఫలిస్తుందా అని ప్రపంచమంతా ఎదురుచూస్తోంది.

శ్రీజ