Posted: 03/13/2012 06:32 PM IST

విశాఖ పర్యాటక రంగంలో ఎర్రమట్టి దిబ్బలు ప్రత్యేక ఆకర్షణ. ఈ సహజ సిద్ద సౌందర్యాన్ని తిలకించేందుకు పర్యాటకులు ఆసక్తి కనబరుస్తారు. అయితే, పాలకుల నిర్లక్ష్యం వల్ల ఈ అరుదైన ప్రకృతి సంపద కనుమరుగయ్యే ప్రమాదంలో పడింది. విశాఖ జిల్లా భీమిలి ఎర్రమట్టి దిబ్బలకు చారిత్రక ప్రాధాన్యత వుంది. ఇవి సహజ సిద్ధంగా ఏర్పడటంతో పర్యాటకులను ఎంతగానో ఆకర్షిస్తాయి. ఒక్కసారి చూస్తే మళ్లీ మళ్లీ వెళ్లాలనిపిస్తుంది.

పక్కనే సముద్రతీరం ఉండటం వల్ల వీటికి మరింత శోభ చేకూరి టూరిస్టుల మనసులను కట్టిపడేస్తాయి. ఇక, ఎర్రమట్టి దిబ్బలు సినిమాలకు హైలైట్‌గా నిలుస్తున్నాయి. విడుదలైన ఐదు సినిమాల్లో ఒక చిత్రం తప్పనిసరిగా ఇక్కడ షూటింగ్‌ జరుపుకుంటుంది. ప్రకృతి ప్రసాదించిన ఈ అందమైన మట్టిదిబ్బలకు ప్రస్తుతం కష్టకాలం వచ్చింది. పాలకులు పట్టించుకోకపోవటంతో కాలగర్భంలో కలిసిపోతున్నాయి.

పరిరక్షణ చర్యలు చేపట్టకపోవటంతో క్రమేపీ కరిగిపోతున్నాయి.రెడ్‌హిల్స్‌ పరిరక్షణ గురించి ప్రభుత్వం పట్టించుకోకపోవటంతో కొందరు పర్యావరణ కార్యకర్తలు హైకోర్టును ఆశ్రయించారు. విశాఖ వారసత్వ సంపదగా నిలుస్తున్న ఈ ఎర్రమట్టి దిబ్బలు త్వరలో పాఠ్యాంశంగా రానున్నాయి. వీటిని కాపాడకపోతే భవిష్యత్‌లో ఇవి పాఠ్యాంశాలలో మాత్రమే కనిపించే ప్రమాదం ఉంది. సర్కార్‌ వెంటనే పరిరక్షణ చర్యలు తీసుకోవాలని టూరిస్టులు కోరుతున్నారు.