ప్రకాశం బ్యారేజ్ 70 గేట్లు ఎత్తివేత-పోలీసుల జులుం

Posted: 09/18/2013 01:46 PM IST

ప్రకాశం బ్యారేజ్ 70 గేట్లను ఈరోజు ఉదయం ఎత్తివేసిన అధికారులు 50,750 క్యూసెక్కుల నీటిని సముద్రంలోకి విడుదల చేశారు. రేపు ఉదయానికల్లా గేట్లు మొత్తం ఎత్తివేసే అవకాశం ఉన్నట్లు తెలుస్తోంది. అటు సాగర్ నుంచి లక్షా 70వేల క్యూసెక్కుల నీరు ప్రకాశం బ్యారేజ్‌కు వచ్చే అవకాశం ఉంది.

 

పోలీసుల జులుం

మండలం భైరవపట్నంలో పర్యటించేందుకు వస్తున్న కేంద్ర జౌళిశాఖ మంత్రి కావూరి సాంబశివరావును అడ్డుకునేందుకు సమైక్యావాదులు ప్రయత్నించగా అపశ్రుతి చోటు చేసుకుంది. సమైక్యాంధ్రకోరుతూ తమ గోడును కావూరికి వివరించేందుకు శాంతియుతంగా నిరసన తెలిపేందుకు వచ్చిన జేఏసీ నేతలపై పోలీసులు విరుచుకుపడ్డారు. కావూరి రాకతో ఒక్కసారిగా భైరవపట్నం సెంటర్లలో తొక్కిసలాట జరిగింది. సమైక్యవాదులను ఒక్కసారిగా పోలీ సులు నెట్టేశారు. దీంతో కైకలూరుకు చెందిన జేఏసీ మహిళలు సుధారాణి సొమ్మసిల్లిపోగా, కళ్యాణి తీవ్రంగా గాయపడింది. గాయపడిన మహిళలను 108 ద్వారా కైకలూరు ఆస్పుత్రికి తరలించారు. దీనిపై అగ్రహించిన జేఏసీ నాయకులు జాతీయ రహదారిపై ధర్నా చేశారు. పోలీసులు డౌన్ డౌన్ అంటూ, పోలీసులు క్షమాపణ చెప్పాలంటూ డిమాండ్‌చేశారు. ఎట్టకేలకు కైకలూరు సీఐ అశోక్‌కుమార్ గౌడ్ జేఏసీ నాయకులకు క్షమాపణచెప్పటంతో ధర్నా విరమించారు.