విజయవాడలో కూలిన సత్రం

Posted: 07/10/2013 10:57 PM IST

హైదరాబాద్ సిటీలైట్ హోటల్ కుప్పకూలిన ఘటన మరవకముందే విజయవాడలో పురాతన సత్రం కుప్పకూలింది. ఈ సంఘటనలో ఒకరికి గాయాలయ్యాయి. నగరంలోని రైల్వేస్టేషన్ సమీపంలోని రాంగోపాల్ సత్రంలోని ఓ విభాగం కుప్పకూలి ఒకరికి గాయాలయ్యాయి. వంద సంవత్సరాలకు పూర్వం సత్రం నిర్మించిందని స్థానికులు పేర్కొంటున్నారు. ఇందులో నివాసం ఉంటున్న ఐదు కుటుంబాల వారు వివిధ పనులపై వెళ్లడంతో ప్రమాదం తప్పింది. గత నాలుగు రోజుల నుండి కురుస్తున్న వర్షాలతో ఈ భవనం కూలిపోయే దశకు చేరుకుందని, వెంటనే అధికారులు స్పందించాలని స్థానికులు కోరుతున్నారు. విజయవాడలో శిథిలావస్థకు చేరుకున్న భవనాలు 300 వరకు ఉన్నాయని, వీటిలో 200 భవనాలు కుప్పకూలేందుకు సిద్ధంగా ఉన్నాయని తెలుస్తోంది. పాతబస్తీ, సింగినగర్, కృష్ణలంక, సత్యనారాయణపురం, విద్యాధరపురం ప్రాంతాల్లో ఏ సమయంలోనైనా కూలిపోయేలా భవనాలు వున్నాయని సమాచారం. ఇటీవలే వర్షానికి పాతబస్తీలో ప్రాంతంలో ఉన్న ఓ ఇల్లు కూలిపోయింది. సొరంగం ఉన్న ప్రాంతంలో భవనం కూలి ముగ్గురు తీవ్రంగా గాయపడ్డారు. కోమల విలాస్ వద్ద భవంతి కూలిపోయి కాంగ్రెస్ కార్యాలయంపై పడింది. ఇప్పటికైనా పెనుప్రమాదం సంభవించకముందే ప్రభుత్వం, అధికారులు మేల్కొని చర్యలు తీసుకోవాలని విజయవాడ వాసులు కోరుతున్నారు.