‘మజ్ను’ కోసం అతిథిగా మారనున్న యంగ్ హీరో

Posted: 11/03/2015 06:21 PM IST

Nitin to do guest role in naga chaitanyas majnu movie

‘జయం’ సినిమాతో హీరోగా తెలుగుతెరకు పరిచయమైన నితిన్.. ఆ తర్వాత వరుసగా విజయాలు సాధిస్తూ దూసుకెళ్లాడు. కానీ.. ఆ తర్వాత ఈ హీరోకి పరాజయాలే మిగిలాయి. అయినప్పటికీ ఓటమిని ఒఫ్పుకోని ఈ కుర్ర హీరో విజయం కోసం చాలాకాలంపాటు వేచి చూశాడు. ఈ నేపథ్యంలోనే ఇతనికి ‘ఇష్క్’ రూపంలో భారీ విజయం లభించింది. ఆ సినిమాతో కెరీర్ ఒక్కసారిగా మలుపు తిరిగింది. ఆ తర్వాత నటించిన సినిమాలన్నీ హిట్ కావడంతో ఈ హీరో ప్రస్తుత హిట్ లిస్టులోకి చేరిపోవడమే కాదు.. ప్రొడ్యూసర్ గా మారాడు. ఇప్పుడు ‘మజ్ను’ కోసం అతిథిగా మారనున్నాడని సమాచారం. ఇంతకీ ఆ మజ్ను ఎవరు? అనేగా సందేహం!

మలయాళంలో రూపొందిన ‘ప్రేమమ్’ చిత్రం అనూహ్యమైన విజయాన్ని సాధించింది. దీంతో ఈ సినిమాను తెలుగులో తెరకెక్కించాలని భావించిన చందూ మొండేటి.. ఇప్పటికే హక్కుల్ని కైవసం చేసుకున్నాడు. ఈ సినిమాకోసం కొంతమంది హీరోలను సంప్రదించగా.. చివరికి నాగచైతన్య గ్రీన్ సిగ్నల్ ఇచ్చేశాడు. ఇక ‘ప్రేమమ్’ నటించిన అనుపమా పరమేశ్వరన్ తెలుగులోనూ కథానాయికగా తీసుకున్నారు. దీంతో.. ఈ చిత్రం ప్రీ-ప్రొడక్షన్ పనులను వేగవంతం చేసిన చిత్రబృందం.. అందులో వున్న రెండు ముఖ్యపాత్రల్లో అవసరమైన నటుల కోసం పరిశీలిస్తున్నారు. ఈ క్రమంలోనే ఒక పాత్రలో నాగార్జునగానీ, వెంకటేష్ గానీ నటించేందుకు సుముఖత వ్యక్తం చేసినట్లు తెలిసింది. ఇక రెండో పాత్ర కోసం నితిన్ ని అడుగుతున్నారని సమాచారం.

అక్కినేని ఫ్యామిలీతో వున్న సాన్నిహిత్యం వున్న కారణంగా నితిన్ ఆ రెండో అతిథి పాత్రలో నటించేందుకు గ్రీన్ సిగ్నల్ ఇస్తాడని అంటున్నారు. పైగా.. ఈ పాత్రలో నటించడం వల్ల నితిన్ కు కూడా బాగానే కలిసొస్తుందని చెబుతున్నారు. ఇందుకు సంబంధించిన అధికారిక ప్రకటన వెలువడాల్సి వుంది. అన్ని అనుకున్నట్లు సవ్యంగానే జరిగితే.. ఈ చిత్రం త్వరలోనే సెట్స్ పైకి వెళుతుందని భావిస్తున్నారు.