‘‘ఐశ్వర్యం’’ కోసం పదహారు కుడుముల తద్ది

Posted: 02/13/2014 01:42 PM IST

ఐశ్వర్యం పొందడం కోసం ఈ నోమును ఆచరిస్తారు. 

విధానం - 

భాద్రపద శుద్ధ తదియ (తెల్లవారితే వినాయక చవితి) నాడు ప్రతీ సంవత్సరం ఈ నోమాన్ని నోచుకుంటారు. ఆరోజు తలస్నానం చేసి, 256 కుడుములను తయారు చేసుకోవాలి. దీంతోపాటు పదహారు కొత్త చేటలు తెచ్చి ఒక్కొక్క చేటలో పదహారు కుడుములు, పదహారు నల్లపూసలు, పదహారు రూపాయల దక్షిణ, రవిక ఉంచి... వాటిని పదహారు మంది ముత్తైదువులకు వాయనమివ్వాలి. వీరికి దాహం తీర్చడం కూడా కొందరికి సంప్రదాయం ఉంది.

ఉద్యాపనం -

ఈ విధంగా పదహారు సంవత్సరాలుపాటు దీనిని ఆచరించాల్సి వుంటుంది. ఆఖరి దశ అయిన పదహారవ సంవత్సరం 116 మంది ముత్తైదువులకు వాయనమివ్వాలి. కానీ ఈ పద్ధతిని చాలామంది వరకు అనుసరించడం లేదు. కేవలం ఒక సంవత్సరం మాత్రమే చేసే నోముగా ఉంది.

కథ -

పార్వతీ పరమేశ్వరలు ఒకసారి భూలోక సంచారం చేస్తుండగా, అడవిలో ఒక రాచకన్య కనిపించింది. ఆ కన్య తల్లిదండ్రులు రాజ్యాన్ని కోల్పోయి అడవులదారి పట్టారని వారు తెలుసుకున్నారు. వారి ఐశ్వర్యం వారికి తిరిగి రప్పించాలనుకుని ఆ రాచకన్య వద్దకు వెళ్లి ఒక నోము చెప్పారు. అదే ఈ పదహారు కుడుముల తద్ది. ఆ నోము నోచుకుంటే కష్టాలన్ని తొలిగిపోతాయని చెప్పి అదృశ్యమయ్యారు పార్వతీ పరమేశ్వరులు. వారు చెప్పిన నోమును పాటించడం వల్ల ఆ రాచకన్యకు కష్టాలు తొలిగిపోయాయి. అప్పటినుంచి ఆమె ఆ నోము ప్రతి సంవత్సరం చేయగా... క్రమంగా వ్యాప్తిలోకి వచ్చింది.