భోగభాగ్యాల భోగి... సంబరాల సంక్రాంతి

Posted: 01/11/2014 10:41 AM IST

సంక్రాంతి అనగానే ముందుగా  గుర్తుకొచ్చేది  పాడి పంటలు..... పచ్చని పల్లె వాతావరణం. ఆరుగాలం రైతు చమటోడ్చి పండించిన  ఫలసాయం చేతి కొచ్చే సమయమిది..  ఈ సందర్ఛాన్ని పురస్కరించుకొని  వేడుకగా చేసుకునే పండుగే  సంక్రాంతి.

సూర్యుడు  మకర రాశిలో ప్రవేశిస్తున్నందున  దీనిని మకర సంక్రాంతి అని కూడా అంటారు..  ముఖ్యంగా  హిందువులు  వేడుకగా చేసుకునే ఈ పండుగ ను భారతదేశంతో పాటు నేపాల్ లోనూ చేసుకుంటారు. జనవరి 13 నుండి 15 వరకూ నిర్వహించే  ఈ వేడుకలో  పిల్లలు  పెద్దలు సామూహికంగా  పాల్గొంటారు. 

చరిత్ర

మకర సంక్రాంతి పండుగ చరిత్రలోకి వెళితే ముందుగా  హిందువులు  సూర్యుడిని  ఆది దైవంగా భావిస్తారు.  సకల చరాచర జగత్తుకు  ఆధారమైన సూర్యుడిని  కీర్తిస్తూ   సూర్యనారాయణ  వేదపారాయణ అంటూ పూజలు చేస్తారు. దేశంలోని  వివిధ ప్రాంతాల ఆచార సాంప్రదాయాలను  అనుసరించి  ఉత్సవాలను చేసుకుంటారు.. ఈ పండుగను  తమిళులు  పొంగల్  పేరుతో నిర్వహించుకుంటారు.

 పంజాబ్ లో దీనిని లోహ్రీగా, అస్సాంలో మాఘ్ బిహుగా, కాశ్మీర్ లో శిషుర్ సంక్రాంతిగా చేసుకోవడం విశేషం. సంక్రాంతి కి ముందు రోజు భోగి పండుగను చేసుకుంటారు. ఆ రోజు  చలిపులిని తరిమికొడుతూ  ప్రజలు ఉదయాన్నే చలి మంటలు వేసుకుని  పిల్లా పెద్దలు అక్కడకు చేరుకుని  చలి కాగుతారు. తమలోని  పాత ఆలోచనలు ఆ అగ్నికి ఆహుతై కొత్త ఆలోచనలు చిగురించాలని  అగ్ని దేవుని వేడుకునేందుకు  గుర్తుగా  తమ ఇంటిలోని పాత చెత్తా చెదారాన్ని ఆ అగ్నిలో ఆహుతి చేస్తారు.  

రెండవ రోజైన సంక్రాంతి నాడు పలు పిండు వంటలు చేసి సూర్యదేవునికి  ప్రసాదంగా సమర్పిస్తారు.. పిల్లలు మహిళలు  ఇంటి ముందు  పోటీలు పడుతూ మరీ ముగ్గులు వేస్తారు. వాటిపై పూలతో అలంకరణలు  చేసి, పేడతో చేసిన గొబ్బెమ్మలను  ఉంచి పాటలు పాడుతూ వాటి చుట్టూ తిరుగుతారు.. మూడవ రోజైన కనుమ రోజున పలు పిండివంటు చేసుకుని  బంధువులతో పాటు విందు వినోదాల్లో పాల్గొంటారు..

ముఖ్యంగా  ఈ పండుగ దినాల్లో పల్లెల్లో కోళ్ల పందాలు  విశేషంగా నిర్వహిస్తుంటారు. .  ఆనందాలకు  ఉత్సాహానికి  ప్రతీకగా చేసుకునే  ఈ పండుగ ఈ ఆధునిక  కాలంలోనూ గ్రామాల్లో  ఎంతో వేడుకగా చేయడం , దీనికి పట్టణాలకు  వలస పోయిన వారు తిరిగి తమ గ్రామాలకు చేరుకుని  వేడుకల్లో పాల్గొనడం విశేషం. ఈ సందర్భంగా  తెలుగు విశేష్ అందరికీ  సంక్రాంతి శుభాకాంక్షలు  తెలియజేస్తోంది.