బాలయ్య డిక్టేటర్ మే నెలలో ప్రారంభం

Posted: 03/27/2015 12:15 PM IST

Balakrishna srivas movie shooting starts on may

‘లెజెండ్’ తర్వాత నందమూరి బాలకృష్ణ ప్రస్తుతం తన 98వ చిత్రం ‘లయన్’లో నటిస్తున్న విషయం తెలిసిందే. సత్యదేవా దర్శకత్వంలో రుద్రపాటి రమణరావు నిర్మిస్తున్న ఈ చిత్ర షూటింగ్ చివరి దశకు చేరుకుంది. ఇటీవలే విడుదలైన ట్రైలర్ మరియు పోస్టర్లకు మంచి స్పందన వస్తోంది. ఇందులో బాలయ్య సరసన త్రిష, రాధిక ఆప్టే హీరోయిన్లుగా నటిస్తున్నారు. ఈ చిత్రాన్ని జూన్ లో విడుదల చేయడానికి సన్నాహాలు చేస్తున్నారు.

ఈ ‘లయన్’ తర్వాత బాలయ్య నటించబోయే 99వ చిత్రం ప్రముఖ దర్శకుడు శ్రీవాస్ దర్శకత్వంలో రూపొందనుంది. ఇప్పటికే ప్రీ ప్రొడక్షన్ పనులు దాదాపు పూర్తయిన ఈ ప్రాజెక్ట్ మే నెలలో సెట్స్ పైకి వెళ్లనుందని తాజా సమాచారం. ఈ చిత్రాన్ని ప్రముఖ నిర్మాణ సంస్థ ఈరోస్ ఇంటర్నేషనల్ వారు నిర్మించబోతున్నారు. కోన వెంకట్, గోపి మోహన్ లు కథను సిద్ధం చేస్తున్నారు.

ఈ చిత్రానికి ‘డిక్టేటర్’ అనే టైటిల్ ఖరారు చేసారు. ఇందులో నయనతార మొదటి హీరోయిన్ గా నటించనుంది. సెకండ్ హీరోయిన్ గా హన్సిక, రెజీనా పేర్లు వినిపిస్తున్నాయి. హైదరాబాద్, డిల్లీ, యూరప్ లలో షూటింగ్ జరిపి, దసరా కానుకగా ఈ సినిమాను విడుదల చేయాలని పక్కాగా ప్లాన్ చేస్తున్నారు.

దాదాపు 40 కోట్ల బడ్జెట్ తో రూపొందనున్న ఈ చిత్రానికి థమన్ సంగీతం అందించనున్నాడు. ఈ ఏడాది దసరా బరిలో బాలయ్య ‘డిక్టేటర్’ సినిమా వుండటం ఖాయమని చిత్ర యూనిట్ చెబుతున్నారు. త్వరలోనే అన్ని వివరాలు అధికారికంగా ప్రకటించనున్నారు.