అనారోగ్యం బారిన పడిన ‘విక్రమా’ర్కుడు..?

Posted: 12/19/2014 03:08 PM IST

ఒకటి కాదు రెండు కాదు ఏకంగా 180 కోట్ల రూపాయల ప్రాజెక్టు.. దానిపైనే ఆశలు పెట్టుకుని గత రెండేళ్లుగా ఇతర సినిమాలకు కూడా దూరమయ్యాడు ఆ హీరో. ఆయన ఎవరో ఇప్పటికే మీకు అర్థమయ్యివుంటుంది. సాంకేతిక పరిజ్ఞానాన్ని విరివిగా వాడటంతో పాటు.. తన సినిమాల ద్వారా చక్కని సందేశాలను ప్రజలకు ఇవ్వడంలో తనదైన ముద్ర వేసుకున్న దర్శకుడు శంకర్ ప్రతాష్టాత్మకంగా చిత్రీకరిస్తున్న చిత్రం ఐ. ఇందులో హీరో విక్రమ్ విభిన్న పాత్రను పోషిస్తున్నాడు. అయితే చిత్రం కోసం తీవ్రంగా శ్రమపడుతున్న విక్రమ్ కఠోర దీక్షనే చేపట్టాడు.

ఈ కఠోర శ్రమ ఫలితంగా ఆయన అనారోగ్యానికి గురైయ్యడని వార్తలు అటు కాలీవుడ్ లో ఇటు టాలీవుడ్ లోనూ షికారు చేస్తున్నాయి. ఇటీవల విక్రమ్ తాజా ఫోటో ఒక్కడి బయటికి రావడంతో.. ఆయన విక్రమేనా.. అంతగా సన్నబడ్డాడు ఏమిటి అంలూ విక్రమ్ ఆరోగ్యంపైన చిత్రసీమ వర్గాల్లో కలవరం మొదలైంది. ఈ ఫొటో నిజమైనదో, మార్ఫింగ్ చిత్రమో తెలీదు కానీ, తాజాగా నెట్‌తో పాటు సోషల్ మీడియాలో విపరీతంగా చకర్లు కొడుతోంది. దీనికి తోడు ఐ చిత్రానికి సంబంధించి విక్రమ్ ఫస్ట్ లుక్ అంటూ సినిమా యూనిట్ విడుదల చేసిన చిత్రంలోనూ విక్రమ్ చాలా సన్నగా కనిపించాడు. శంకర్ దర్శకత్వంలో ‘ఆస్కార్’ రవిచంద్రన్ నిర్మించిన ఈ చిత్రంలో విక్రమ్ పలు రకాల గెటప్స్‌లో కనిపిస్తారు. అందులో బక్కపలచని అవతారం ఒకటి. ఆ గెటప్ కోసమే విక్రమ్ సన్నబడిపోయారని సినిమా యూనిట్ వర్గాలు చెబుతున్నారు.
 
ఎముకల గూడును తలపించే ఈ దేహం కోసం షూటింగ్ సమయంలో ఆహారపరంగా, వ్యాయామాల పరంగా శరీరాన్ని చాలా కష్టపెట్టుకున్నారట. పాత్ర కోసం విక్రమ్ గతంలో కూడా పలు రిస్కులు తీసుకున్నారు. ‘ఐ’ కోసం తీసుకున్న ఈ రిస్క్ వాటన్నింటికీ పరాకాష్ఠ అని తమిళ సినీ జనం చెవులు కొరుక్కుం టున్నారు. ఫొటో నిజానిజాల మాటెలా ఉన్నా శరీరం మీద ప్రయోగాలు చేయడం శ్రేయస్కరం కాదనీ, విక్రమ్ తన ఆరోగ్యాన్ని కూడా దృష్టిలో పెట్టుకోవాలని సన్నిహితులు సూచిస్తున్నారు. అయితే గత రెండేళ్లుగా తీవ్ర శ్రమకు ఒర్చిన సినిమా యూనిట్ కు ప్రేక్షకుల నుంచి మంచి స్పందనలే ఎదురవుతున్నాయి. సినిమాకు సంబంధించిన తొలి థియరాటికల్ ట్రయిలర్ ను విడుదల చేశారు. ఈ థియరాటికల్ ట్రేయిలర్ కు ప్రేక్షకులు, మీడియా వర్గాల నుంచి మంది ఆదరణ లభిస్తోంది.

జి. మనోహర్