తప్పుకుందా...? తప్పించుకుందా..?

Posted: 10/16/2014 09:54 AM IST

ఇంటిపేరు సిల్కు అంటూ ‘అల్లుడు శీను’ సినిమాలో చిందులేసిన తమన్నా.., శ్రీను రెండవ సినిమాలో నటించటం లేదన్న విషయం తెలిసిందే. బెల్లంకొండ ఫ్యామిలి ప్రాజెక్టును వద్దు అనుకోవటానికి మిల్కిబ్యూటీ చెప్పిన కారణం.. కాల్షీట్లు ఖాళీగా లేవు, డేట్లు కుదరటం లేదు అని. ఎందుకంటే ప్రస్తుతం ‘బాహుబలి’లో బిజీగా ఉన్న ఈ భామ త్వరలోనే మరో తమిళ సినిమాలో నటించనుంది. దీంతో పాటుగా నిర్మాత సురేష్ కు ఉన్న ఆర్దిక ఇబ్బందుల కారణంగా ఈ సినిమా షూటింగ్ ఆలస్యంగా ప్రారంభం అవుతున్నందు వల్ల తనకు డేట్లు అడ్జస్ట్ చేయటం ఇబ్బంది అవుతుందని సినిమా నుంచి బయటకు వచ్చేసిందట. ఇది శ్రీను సన్నిహితులు చెప్తున్న మాటలు.. అయితే ఫిలింనగర్ లో మరోవిధమైన గుసగుసలు విన్పిస్తున్నాయి.

అదేమంటే ‘అల్లుడు శీను’ సినిమాలో తమన్నా ‘నా ఇంటి పేరు సిల్కు.., ఒంటిరంగు మిల్కు’ అనే ఐటం సాంగ్ లో కన్పించింది. డాన్స్  కు తగ్గట్టుగానే మిల్కీకి బాగానే ముట్టజెప్పిందని టాక్ వచ్చింది. అయితే ఈ సినిమా ఫ్లాప్ అయింది. తొలి సినిమానే ఫ్లాప్ కావటంతో.., రెండవ ప్రాజెక్టుపై ప్రేక్షకులు ఎలా స్పందిస్తారని ముద్దుగుమ్మ సన్నిహితులు సందేహం వ్యక్తం చేశారట. బాగానే డబ్బులు వస్తుండొచ్చు కాని ఫెయిల్ అయితే మాత్రం ఫ్యూచర్ కు దెబ్బ పడుతుందని సలహా ఇచ్చారని విశ్వసనీయ వర్గాల సమాచారం. దీంతో ఎందుకు రిస్క్ చేయటం అనుకుని ప్రాజెక్టు నుంచి బయటకు వచ్చేసిందని గుసగుసలు విన్పిస్తున్నాయి.

అటు బెల్లకొండ ఆర్ధిక ఇబ్బందులు కూడా మరోకారణమట. అంటే పైనాన్షియల్ క్రైసిస్ వల్ల షూటింగ్ ఆలస్యం అయింది. కొద్దిరోజులకు ప్రారంభం అయినా.., మళ్ళీ ఏ ఇబ్బంది రాదు అని గ్యారెంటి ఇవ్వలేము. ఇంకో విషయం ఏమిటంటే ‘రభస’ సినిమా మాదిరిగా ఫైనాన్ష్ ప్రాబ్లం వల్ల సినిమా విడుదల ఆలస్యం అయితే అని డౌట్ వచ్చిందట. మరోవైపు ఇంత కష్టపడి డేట్లు సర్దుకుని షూటింగులకు వస్తే.., రావాల్సిన రెమ్యునరేషన్ టైంకు రాకపోతే అనే అనుమానాలు కూడా బలాన్నిచ్చాయి. అందువల్ల ఎందుకీ గొడవంతా అనుకుని సింపుల్ డేట్లు కుదరటం లేదు అని సారి చెప్పేసి తెలివిగా తప్పించుకుంది అని కొందరు అంటున్నారు. మరి దీనిలో ఎంతవరకు వాస్తవం ఉందో తమన్నాకే తెలియాలి.

కార్తిక్