పవన్ ను కలిసే ఉద్దేశం చిరుకు లేదా..?

Posted: 09/16/2014 11:14 AM IST

Chiranjeevi says pawankalyan will attend govindudu andarivadele 150days celebrations

గోవిందుడు అందరివాడేలే ఆడియో విడుదలైంది. ప్రస్తుతం ఫ్యాన్స్ పాటలను ఎంజాయ్ చేస్తున్నారు. అయితే ఆడియో ఫంక్షన్ కు వచ్చిన ప్రేక్షకులు, కార్యక్రమాన్ని టీవీలో చూసిన అభిమానులకు ఒకటే బాధ మిగిలింది. అదే పవర్ స్టార్ ఈ కార్యక్రమంకు రాకపోవటం. పవన్ కళ్యాణ్ రాలేదే.. వస్తే బాగుండు అని మెగా ఫ్యాన్స్ అంతా అనుకున్నారు. వారందరికి ఊరటనిచ్చేలా మెగాస్టార్ చిరంజీవి ఒక ప్రకటన చేశారు. కళ్యాణ్ అందరివాడి 150 దినోత్సవ వేడుకలకు వస్తాడని.., దీంతో ఆడిటోరియంలో ఆనంద హేళ కన్పించింది. కాని చిరు మాటలు పలు అనుమానాలకు తావిస్తున్నాయి. అసలు తమ్ముడిని కలిసే ఉద్దేశ్యం ఉందా? లేదా అని విశ్లేషకులు ప్రశ్నలు వేసుకుంటున్నారు.

చిరు ప్రకటన ప్రకారం 150 దినోత్సవ వేడుకలకు పవన్ వస్తాడు. అంటే అప్పటి వరకు ఏ కార్యక్రమంకు ఆయన హాజరుకాబోడని పరోక్షంగా చెప్పినట్లే అని అంటున్నారు. ఎందుకంటే ఆ లోపు ఆడియో ప్లాటినం డిస్క్, సినిమా సక్సెస్ మీట్, యాబై రోజులు, వంద రోజుల పండగలు కూడా ఉన్నాయి. వీటికి తమ్ముడు రాడు అని పరోక్షంగా చెప్పినట్లే అని భావిస్తున్నారు. ఇక మరో విషయానికి వస్తే సినిమాలు ఇప్పుడు ఎక్కడా 150 రోజులు ఆడటం లేదు. 100 రోజులు 200సెంటర్లు అనే రికార్డుల చరిత్రలు ఎప్పుడో పోయాయి. మహా అయితే వంద రోజులు.., నూట యాబైయవ రోజు ఆ సినిమా టీవీలో ప్రత్యక్షం అవతుంది. ఇంకా చెప్పాలంటే అంతకు ముందే వచ్చినా ఆశ్చర్యపోనక్కర్లేదు.

మరి ఇలాంటి సమయంలో 150రోజుల వేడుకలు ఎలా జరుగుతాయి అని సినీ విశ్లేషకులు అంటున్నారు. అంటే అక్టోబర్ 1న విడుదలయ్యే సినిమా 2015 పిబ్రవరి వరకూ ఆడుతూనే ఉండాలన్నమాట. దీన్నిబట్టి చిరంజీవికి పవన్ కళ్యాణ్ ను కలిసే ఉద్దేశ్యం ఉందా..? లేదా? అని అనుకుంటున్నారు. అయితే ఇవి చిరు అన్న మాటలకు అర్థాలు కావనీ.. కేవలం వారికి వచ్చిన సిల్లీ అనుమానాలని చెప్తున్నారు.

కార్తిక్