Posted: 05/15/2012 06:33 PM IST

‘గబ్బర్‌సింగ్’ ఘనవిజయం కమల్‌హాసన్ ముద్దుల తనయ శృతిహాసన్ భవితనే మార్చేసింది. హిందీ చిత్రం ‘లక్’ ద్వారా సినీరంగంలో తెరంగేట్రం చేసిన ఈ సుందరికి ఆది నుంచి లక్ కలసిరావడం లేదు. చూడముచ్చటైన రూపంతో, చక్కటి అభినయకౌశలంతో అలరారే శృతిహాసన్‌కు ఇన్నాళ్లుగా కమర్షియల్ విజయం అందని ద్రాక్షపండే అయింది. నటించినవి పెద్ద చిత్రాలే అయినా బాక్సాఫీస్ దగ్గర సదరు చిత్రాలు పరాజయం పాలవడంతో ఈ ముద్దుగుమ్మ గతకొంత కాలంగా అసంతృప్తితో వుంది. ఈ భామ కథానాయికగా నటించిన ఆరు చిత్రాల్లో ఒక్కటి కూడా సరైన విజయానికి నోచుకోలేదు. దాంతో ఈ భామ పై ఐరెన్ లెగ్ అనే మరక (ముద్ర) పడింది. 

తాజాగా ‘గబ్బర్‌సింగ్’ విజయంతో ద్విగిణీకృత ఉత్సాహంతో వుంది శృతిహాసన్. ఈ చిత్ర హిందీ మాతృక ‘దబాంగ్’లో సోనాక్షి సిన్హా పోషించింది చిన్న పాత్రే అయినా బాలీవుడ్‌లో ఆమెకు మంచి పాపులారిటీని సంపాదించిపెట్టింది. తాజాగా అదే పాత్రను తెలుగులో పోషించిన శృతిహాసన్‌కు ప్రేక్షకుల నుంచి మంచి ప్రశంసలు లభిస్తున్నాయి. ఈ సందర్భంగా శృతిహాసన్ ట్విట్టర్ ద్వారా తన ఆనందాన్ని వ్యక్తం చేసింది. ‘నాపై నమ్మకం పెట్టుకున్న అభిమానులందరికీ కృతజ్ఞతలు. భవిష్యత్తులో మరింత కష్టపడేలా మీరు నాకు ఉత్సాహాన్నందించారు. ఇక నుంచి విభిన్న కథాంశాల్ని ఎంచుకుంటూ నటిగా మీరందరూ గర్వించేలా సినిమాలు చేస్తాను’ అని ట్విట్టర్‌లో వ్యాఖ్యానించింది శృతిహాసన్.