Posted: 08/28/2012 12:02 PM IST

టీటీడీకి స్పెసిఫైడ్‌ అధారిటీని ఏర్పాటు చేయాలనుకున్న సిఎం... ఉన్నపళంగా పాలకమండలిని ఎందుకు నియమించినట్టు? ఛైర్మన్‌గా బాపిరాజుకు మరోసారి అవకాశం రావడానికి రాష్ట్రపతి ప్రణబే కారణమా?  ఛైర్మన్‌ పదవి దక్కలేదన్న అసంతృప్తితో ఉన్న ఎంపీ రాయపాటి ఇపుడు ఎం చేయబోతున్నారు? ఇష్టానుసారం నియామకాలు చేసిన సిఎం...టీటీడీని రాజకీయ పునరావాసంగా మార్చేసారా? టిటిడి చైర్మన్‌ పదవి రెండోసారి కూడా ఎంపీ కనుమూరి బాపిరాజును వరించడం కాంగ్రెస్‌లో చిచ్చుపెడుతోంది. అధిష్టానం ఆశీస్సులతోనే బాపిరాజుకు పదవి దక్కందని కాంగ్రెస్‌ వర్గాలుంటున్నాయి. రాష్ట్రపతి ఎన్నికల్లో ప్రణబ్‌కు మొట్టమొదటి ఓటు వేసింది బాపిరాజే. ఆ సెంటిమెంట్‌ వర్కవుట్‌ అవడం వల్లే ఆయనకు మరోసారి టిటిడి బోర్డు చైర్మన్‌ పదవి వరించిందంటున్నాయి పార్టీ వర్గాలు. మొదట పాలకమండలి నియామకానికి బదులుగా అధికారులతో స్పెసిఫైడ్‌ అధారిటీ ఏర్పాటుపై సిఎం కసరత్తు కూడా చేసారని .... అయితే రాష్ట్రపతి ఆశీస్సులున్న బాపిరాజుకు టిటిడి చైర్మన్‌ పదవి ఇవ్వాలంటూ హై కమాండ్‌ నుంచి ఆదేశాలందడంతో సిఎం కిరణ్‌ ఉన్న పళంగా పాలకమండలి నియామక ఫైలుపై సంతకం చేశారని సచివాలయ వర్గాలంటున్నాయి.

టిటిడి పదవి కావాలంటూ ఎప్పటి నుంచో పట్టు బడుతున్న గుంటూరు ఎంపీ రాయపాటి సాంబశివరావుకు మొండిచేయి చూపడంతో ఆయన వర్గీయులు తీవ్ర ఆగ్రహంతో ఉన్నారు. కాంగ్రెస్‌కు రాజీనామా చేయాలంటూ ఒత్తడి చేస్తున్నారు. రాయపాటి మాత్రం సోనియాను కలిశాకే తన నిర్ణయాన్ని ప్రకటిస్తానంటూ పార్టీ పెద్దలకు షాక్ ఇస్తున్నారు. అయినా  పొరుగు రాష్ట్రాల వారికి పాలకమండలిలో స్ధానం కల్పించడమేంటని ప్రశ్నిస్తున్నారు. ఇక సిఎం కిరణ్‌ సొంత జిల్లా చిత్తూరుకు చెందిన మాజీ ఎమ్మెల్యే జీవీ శ్రీనాధరెడ్డికి బోర్డు మెంబర్‌ పదవి ఇవ్వడాన్ని కూడా కాంగ్రెస్‌ నేతలు తప్పుపడుతున్నారు. సిఎం కిరణ్‌ ఇష్టానుసారంగా ఇలా బోర్డు సభ్యులను నియమించడం వల్లే తిరుమల తిరుపతి పవిత్రత దెబ్బతింటోందని భక్తులు ఆవేదన చెందుతున్నారు....