Posted: 08/28/2012 11:54 AM IST

కాంగ్రెస్ పార్టీ పీసీసీ అధ్యక్షుడు బొత్స సత్యనారాయణపై సీఎం కిరణ్ చేస్తున్న రచ్చ అంత ఇంతకాదని  రాష్ట్ర ప్రజలకు తెలిసిన విషయమే. అయితే  జోడు పదవులనుభవిస్తున్న పీసీసీ చీఫ్‌ బొత్సకు పదవులంటే పరమ అసహ్యం వేస్తోంది. నల్లారి వారి పాలన కంటే నారా వారి పాలనే బెటరనిపిస్తోంది. పీసీసీ అధ్యక్షుడిగా తన పదవి ఇక మాణ్ణాళ్ల ముచ్చటే అని తెలిసినప్పటి నుంచీ బొత్స డీలా పడిపోయారు.పదవి ఉంటే ఎంత...పోతే ఎంత.. నాడు పదవి కోరుకోలేదు..నేడు పోతే బాధ పడేది లేదు. రాష్ట్రంలో పాలన చూస్తుంటే సిగ్గేస్తోంది....ఇవీ పీసీసీ అధ్యక్షుడు బొత్స సత్యనారాయణ వ్యాఖ్యలు. కొద్ది రోజులుగా ఢిల్లీలోనే మకాం వేసిన ఆయనకు పీసీసీ చీఫ్‌ మార్పుపై స్పష్టమైన సంకేతాలందాయని సమాచారం. దీంతో బొత్సా తన నిర్వేదాన్ని సన్నిహితుల వద్ద వెళ్లగక్కుతున్నారు.

పీసీసీ పదవి వస్తుందని  ఊహించలేదని, తాను స్వయంగా ఆ పదవి కోరుకోలేదని, ఇప్పుడు ఊడినంత మాత్రాన భయపడేది లేదని చెప్పుకొస్తున్నారు. ప్రభుత్వ పాలన గాడిన పడకపోవడం, పథకాల అమలులో పార్టీ కార్యకర్తలను భాగస్వాములను చేయకపోవడం వంటి అంశాలు తన కొంప ముంచుతున్నాయని బొత్స విచారం వ్యక్తం చేస్తున్నారని ఆయన సన్నిహితులంటున్నారు. గతంలో ఎన్నడూ లేనివిధంగా కరెంట్‌ కోతలు వేధిస్తుండటంతో జనం రోడ్డెక్కుతున్నారని, రాష్ట్రంలో పరిపాలనను చూస్తుంటే సిగ్గేస్తోందని సీఎంనుద్దేశించి బొత్సా వాపోతున్నారట. చంద్రబాబు అధికారంలో ఉన్నప్పుడు ఎనిమిదేళ్లు కరువు ఉన్నా కానీ కరెంట్‌ కోతలు లేవని, సీఎం కిరణ్‌కు ముందుచూపు లేకపోవడం వల్లే ఇంత తీవ్రమైన కరెంట్‌ కోతలు రాష్ట్రాన్ని వేధిస్తున్నాయని బొత్స తన వర్గీయుల వద్ద ఆవేదన వ్యక్తం చేస్తున్నారట. మొత్తానికి పీసీసీ పదవి పోతుందన్న వేళ బొత్సా వారు నారా వారి పాలనే బెస్ట్‌, నల్లారి వారి పాలన వేస్టంటూ రాగాలు తీయడంపై ఆయన వర్గీయులు ఆశ్యర్యం వ్యక్తం చేస్తున్నారు.