Posted: 08/01/2012 05:46 PM IST

జగన్ పై ఉన్న అభిమానంతో ..  ఒక వ్యక్తి  సీబీఐ జేడీ మీద  పిటిషన్ వేసిన విషయం తెలిసిందే. అయితే  అభిమానికి  హైకోర్టు  పెద్ద షాక్ ఇచ్చి  .. కళ్లు తెరిపించింది. సీబీఐ కేసుల దర్యాప్తు విషయాలను మీడియాకు వెల్లడిస్తున్నారంటూ సీబీఐ జేడీ లక్ష్మీనారాయణకు వ్యతిరేకంగా వచ్చిన పిటీషన్ ను తోసిపుచ్చిన హైకోర్టు ప్రజాప్రయోజన వ్యాజ్యమంటూ ఉద్దేశపూర్వకంగా తప్పుడు పిటీషన్ వేశారంటూ ఆగ్రహించి ఏకంగా రూ.2 లక్షలు జరిమానా విధించింది. అయితే పిటీషనర్ తరపు న్యాయవాది వేడుకోవడంతో ఆ మొత్తాన్ని రూ.25 వేలకు కుదించడంతో పిటీషనర్ కాస్తా ఊపిరిపీల్చుకుని బతుకుజీవుడా అంటూ బయటపడ్డాడు. 

మీడియాకు సమాచారం లీక్ చేస్తున్న సీబీఐ జేడీపై చర్యలు తీసుకోవాలని, ఆయన ఫోన్ కాల్‌లిస్టును కోర్టు పరిశీలనకు తీసుకోవాలని కోరుతూ గుంటూరుకు చెందిన భూషణ్ బి భవనం హైకోర్టులో ప్రజా ప్రయోజన వ్యాజ్యం దాఖలు చేశారు. ఎమ్మార్, జగన్ అక్రమాస్తుల కేసుల్లో ప్రముఖుల వాంగ్మూలాలను లక్ష్మీనారాయణ ఒక వర్గం మీడియాకు చెప్పడం వల్ల ఆ అంశాలను అవి పూసగుచ్చినట్లు ఇస్తున్నాయని, వాటికి తోడు తమ సొంత కథనాలను కూడా ప్రచారంలోకి తెస్తున్నాయని కోర్టు దృష్టికి తెచ్చారు. హైకోర్టు తాత్కాలిక ప్రధాన న్యాయమూర్తి జస్టిస్ పీసీ ఘోష్, జస్టిస్ నౌషత్ అలీతో కూడిన ధర్మాసనం పరిశీలించింది. ‘ఈ కేసులో పిటిషనర్‌కు ఉన్న ఆసక్తి ఏంటి ? ఇందులో ప్రజా ప్రయోజనాలు ఏమున్నాయ’ని ఆగ్రహం వ్యక్తం చేసింది. ఆగస్టు 13లోగా జరిమానా చెల్లించాలని ఆదేశించింది. ఏదో సంచలనం చేద్దామని పిటీషన్ వేసిన వ్యక్తికి హైకోర్టు గట్టి షాక్ ఇచ్చింది. అనవసరంగా కోర్టు సమయాలను వృధా చేసేవారికి ఇది గుణపాఠంగా ఉపయోగపడుతుంది.