Posted: 07/23/2012 03:35 PM IST

తథాస్తు దేవతలు తథాస్తు అన్నట్లు తన మాటలు నిజమయ్యాయని ప్రణబ్ సోదరి అన్నపూర్ణ బెనర్జీ ఉబ్బితబ్బిబ్బవుతున్నారట. "చాలా ఏళ్ల కిందట.. అప్పట్లో ప్రణబ్ యువ ఎంపీ. ఓరోజు వాళ్ల బంగ్లా వరండాలో మేమిద్దరం కూర్చుని టీ తాగుతున్నాం. అక్కణ్నుంచి చూస్తే రాష్ట్రపతి భవన్‌లోని గుర్రపుశాల స్పష్టంగా కనిపిస్తుంది. ప్రణబ్ ఆ గుర్రాల్ని చూస్తూ... "ఎంత హాస్యాస్పదమో చూడు. ఆ గుర్రాలకు చేసే పనేమీ ఉండదు. కానీ రోజంతా చక్కగా మేపుతారు. మళ్లీ జన్మంటూ ఉంటే ఆ గుర్రాల్లో ఓ గుర్రంలా పుట్టాలని కోరుకుంటున్నా అని ప్రణబ్ చెప్పిటనట్లు తెలుస్తోంది అప్పుడు తన సోదరి  గుర్రంలా ఏం ఖర్మ. ఏదో ఒకరోజు ఈ దేశానికి రాష్ట్రపతివే అవుతావు  ఆమె చెప్పటం జరిగిందట. అది ఈరోజు నిజమైంది'' అని అన్నపూర్ణ గతాన్ని గుర్తు చేసుకోని ఆనందంతో  నవ్వుకున్నారట.రాష్ట్రపతి ఎన్నికల్లో ప్రణబ్ విజయం సాధించారని తెలిసిన వెంటనే, 'నాకెంత ఆనందంగా ఉందో' అన్నారామె. "చిన్నప్పుడు స్కూలుకు వెళ్లనని మారాం చేసేవాడు.

ప్రణబ్‌ను స్కూలుకు పంపడం ఓ ప్రహసనమే. ఓసారి మా అమ్మ ప్రణబ్‌ను చితక్కొట్టేసింది. దాంతో స్పృహ కోల్పోయాడు. అయినా వెళ్లేవాడు కాదు'' అని ఆమె గుర్తు చేసుకున్నారు. చిన్నప్పటి నుంచి ప్రణబ్‌కు దైవభక్తి ఎక్కువేనని, రోజూ పూజ చేసేవారని చెప్పారు. ప్రజా జీవితంలో ఆయనకు చాలా పెద్ద హోదా ఉన్నప్పటికీ.. ఆయన చాలా జోక్స్ వేస్తారని చెప్పారు. రాత్రి 11 దాటాక మనవలతో కలిసి ఆడుకుంటారని, పద్యాలు చెబుతారని, జోక్స్ పేలుస్తారని వివరించారు. ఆదివారమంతా ఆమె తన కుటుంబ సభ్యులతో కలిసి టీవీ ముందే కూర్చున్నారు. 'ఫలితం తెలిసిందే అయినా ప్రకటించే వరకూ ఉత్కంఠగానే ఉన్నా' అని ఆమె అన్నారు. తన ఆరోగ్యం బాగా లేదని, అందువల్ల ఆయన ప్రమాణ స్వీకారానికి వెళ్లలేనని చెప్పారు. కాగా, ప్రణబ్ పూర్వీకుల గ్రామం మిరిటిలో సంబరాలు అంబరాన్నంటాయి. తమ గడ్డపై పుట్టిన బిడ్డ భారతదేశంలోనే అత్యున్నత పదవైన రాష్ట్రపతిగా ఎన్నికయ్యారని అక్కడి ప్రజలు ఆనందోత్సాహాలతో పండుగ చేసుకుంటున్నారు.