Posted: 07/07/2012 03:40 PM IST

ఇప్పటి వరకు కిరణ్ కుమార్ పై  దానం ఎలాంటి ప్రకటలను  చెయ్యలేదు.  కానీ మొదటి సారి  ముఖ్యమంత్రి తీసుకున్న నిర్ణయానికి దానం  అడ్డం తిరిగినట్లు మీడియా వర్గాలు అంటున్నాయి. కృష్ణా డెల్టాకు నాగార్జున సాగర్ నుంచి కృష్ణా జలాలను విడుదల చేయాలనే ముఖ్యమంత్రి నిర్ణయానికి తెలంగాణ నాయకుల నుంచి వ్యతిరేక పెరుగుతున్న విషయం తెలిసిందే.  అయితే  ముఖ్యమంత్రి నిర్ణయాన్ని తాజాగా హైదరాబాదుకు చెందిన మంత్రి దానం నాగేందర్ వ్యతిరేకిస్తున్నట్లు  కాంగ్రెస్ నాయకులు అంటున్నారు.  నాగార్జన సాగర్‌లో డెడ్ స్టోరేజీ ఉండగా కృష్ణా డెల్టాకు నీటిని విడుదల చేయడం సమంజసం కాదని దానం అంటున్నారు. దీని వలన  హైదరాబాద్‌లో తీవ్ర నీటి ఎద్దడి ఏర్పడుతుందని  మంత్రి దానం నాగేందర్ అంటున్నారు.

కృష్ణా డెల్టాకు నీటిని తక్షణమే ఆపాలని దానం  డిమాండ్ చేస్తున్నారట. అలా ఆపకపోతే హైదరాబాదుకు అన్యాయం చేసినవారవుతారని  దానం చెబుతున్నారు. హైదరాబాద్ నగర శివారు మున్సిపాలిటీల్లో కొన్ని చోట్ల వారం రోజులకు కూడా మచినీరు వచ్చే పరిస్థితి లేదని ఆయన అన్నారు. కృష్ణా డెల్టాకు నీటి విడుదల సబబేనని నల్లగొండ జిల్లాకు చెందిన మంత్రి కె. జానా రెడ్డి వంటివారు వ్యాఖ్యానించడం సరి కాదని  మంత్రి దానం సీరియస్ గా అంటున్నారు.  అలాగే మెడికల్ సీట్ల విషయంలో కూడా హైదరాబాదుకు అన్యాయం జరిగిందని దానం మండిపడుతున్నారు. నగరంపై సవతి తల్లి ప్రేమ చూపిస్తున్నారని ఆయన విమర్శించారు. హైదరాబాదుకు అన్యాయం జరిగితే తాము ప్రేక్షక పాత్ర వహించబోమని గుర్తు చేశారు. తమ వాణిని బలంగా వినిపిస్తామని ఆయన చెప్పారు. మెడికల్ సీట్ల కేటాయింపులో ఒకే సామాజిక వర్గానికి ప్రాధాన్యం ఇచ్చారని మంత్రి చెబుతున్నారు.

కృష్ణా డెల్టాకు నాగార్జునసాగర్ నుంచి నీటిని విడుదల చేయడాన్ని తెలంగాణ రాష్ట్ర సమితి (తెరాస) నాయకులతో పాటు కాంగ్రెసుకు చెందిన తెలంగాణ ప్రాంత నాయకులు కూడా వ్యతిరేకిస్తున్నారు. పాల్వాయి గోవర్ధన్ రెడ్డి వంటి కాంగ్రెసు నాయకులు ప్రభుత్వ నిర్ణయాన్ని వ్యతిరేకిస్తున్నారు. తాజాగా దానం నాగేందర్ ఆ వర్గంలో చేరినట్లు మీడియా వర్గాలు అంటున్నాయి.