Posted: 03/13/2012 04:41 PM IST

సాధారణంగా అయితే గుండెకు రక్త సరఫరా ఆగిపోతే ‘గుండెపోటు’ వస్తుంది. దీని కారణంగా అనేక మంది ప్రాణాలు కోల్పోతున్న విషయం తెలసిందే. మరి దీనికి కారణం మన శరీరంలో కొవ్వు పేర్కొని పోవడమే. కొవ్వు ఎక్కువ కాలరీలు ఉన్న పదార్ధాలను తీసుకోవడం వలన తయారు అవుతుంది. గుండెపోటు రావడం అనేది మన చేతిలో ఉండదు. కానీ ఇక్కడ ఓ హోటల్ కి వెళితే మాత్రం గుండె పోటు తెప్పిస్తారట.

అసలు విషయం ఏంటంటే... లాస్ వేగాస్ లో ఓ హోటల్ ఉంది. ఆ హోటల్ పేరు ‘హార్ట్ ఎటాక్ గ్రిల్’. ఎవరైనా అక్కడికి వెళితే వాళ్ళు చనిపోయే ప్రమాదం ఉందట. (గో వే, ఇఫ్ యు కమ్ టు దిస్ ప్లేస్, ఇట్స్ గోయింగ్ టు కిల్ యూ ) అని ఆ హోటల్ కి ఉప శీర్షిక  కూడా పెట్టుకున్నారు.ఆ హోటల్ పేరుకు తగ్గట్లుగానే ఈ మధ్య ఓ 40 ఏళ్ళ పెద్ద మనిషి ఈ హోటల్ కి వచ్చి మెనూలో ఉన్న రకరకాల గుండె సర్జరీల పేర్లలో నుండి ‘ట్రిపుల్ బైపాస్ బర్గర్’ పేరుతో ఉన్న వంటకాన్ని తెప్పించుకున్నాడు. మాంసం, చీజ్ తో చేసిన ఆరువేల క్యాలరీల బర్గర్ అది. దాన్ని తినడం మొదలు పెట్టిన కాసేపటికే ఆయనకు గుండెనొప్పి మొదలైందట. అలా బైపాస్ బర్గర్ తిని పాపం బైపాస్ సర్జరీ చేయించుకునే స్థితికి తెచ్చుకున్నాడాయన.

ఈ సంఘటనతో ఇప్పుడు ఈ హోటల్ మరోసారి వార్తల్లోకి ఎక్కింది. నిజానికి కొన్నేళ్ళ కిందట దీన్ని ప్రారంభించినప్పుడే స్థానికంగా చాలా విమర్శలు వచ్చాయి. వేల క్యాలరీలు ఉండే ఇక్కడి జంక్ ఫుడ్ ను తింటే గుండెపోటు వచ్చే అవకాశాలు చాలా ఎక్కువ మరి. విచిత్రం ఏంటంటే... దాన్ని తినడానికే జనాలు ఎగబడి రావటం విశేషం. కలికాలం అంటే ఇదేనేమో...