Posted: 02/10/2012 11:02 AM IST

జెనీలియా, రితేష్‌ల పెళ్లి పుణ్యమా అని పెళ్లి కాకుండా మిగిలిన బాలీవుడ్ ప్రేమికులకు మీడియా నుంచి ‘మీ పెళ్ళెప్పుడు?’ అనే ప్రశ్న గట్టిగానే తగులుతోంది. వారిలో అసిన్ ఒకరు. ప్రస్తుతం అసిన్ ఈ ప్రశ్నలకు సమాధానం చెప్పలేక సతమతమైపోతున్నారు. ఇటీవల సల్మాన్, అసిన్ అనుబంధంపై మీడియాలో రకరకాలుగా కథనాలు వెలువడ్డాయి. జెన్నీ వ్యవహారం పెళ్లి పీటల దాకా వచ్చేయడంతో... త్వరలో అసిన్ కూడా పెళ్లికూతురు కాబోతోందని, సల్మాన్ నిర్ణయంపైనే వారిద్దరి పెళ్లి ఆధారపడి ఉందని వివిధ టీవీ చానల్స్‌లో కథనాలు వెలువడ్డాయి. దాంతో అసహనం పాలైన అసిన్ మీడియాకు ఓ ప్రకటన విడుదల చేశారు.

‘‘నేను కేరళ అమ్మాయిని. సంప్రదాయబద్ధమైన కుటుంబంలో పుట్టినదాన్ని. నా పెళ్లి నా జన్మస్థలంలో, మా సంప్రదాయానికి తగ్గట్టుగా జరుగుతుంది. నేను ఎవరినీ ప్రేమించలేదు. ప్రేమించడానికి నేను ఈ రంగంలోకి రాలేదు. నాకు చాలామంది ఫ్రెండ్స్ ఉన్నారు. వాళ్లలో సల్మాన్ కూడా ఒకరు. అంతేతప్ప ఆయనకూ నాకూ వేరే ఎలాంటి సంబంధం లేదు. పైగా ఆయన నాకంటే చాలా పెద్దవారు. సల్మాన్ పెళ్లాడాలనుకుంటే... నన్ను మించిన అందగత్తెలు చాలామంది క్యూలో ఉంటారు. ఆయనకు గానీ, నాకు గానీ మీరు ఊహించినట్టుగా ఎలాంటి ‘బంధం’ లేదు. మరో నాలుగేళ్ల తర్వాత నా పెళ్లి గురించి ఆలోచిస్తా. ఈ లోగా దయచేసి ఇలాంటివి పుట్టించొద్దు’’ అని ఆ ప్రకటన ద్వారా వివరణ ఇచ్చారు అసిన్.