ఉత్తేజ్ కు సతీవియోగం.. కంటతడి పెట్టిన చిరంజీవి, ప్రకాశ్ రాజ్

Posted: 09/13/2021 11:39 AM IST

సినీనటుడు, రచయిత ఉత్తేజ్ ఇంట విషాదం నెలకొంది. ఆయన భార్య పద్మావతి ఇవాళ కన్నుమూశారు. గతకొన్ని రోజులుగా క్యాన్సర్ తో బాధపడుతున్న అమె నగరంలోని బసవతారకం క్యాన్సర్ ఆసుపత్రిలో చికిత్స పొందుతూ ఈరోజు తుదిశ్వాస విడిచారు. ఆమె వయసు 48 సంవత్సరాలు. ఆమె మృతి పట్ల పలువురు సినీ ప్రముఖులు సంతాపం ప్రకటించారు. ఉత్తేజ్ కుటుంబానికి సానుభూతిని తెలియజేస్తున్నారు. ఉత్తేజ్ కు ఆయన భార్య అన్ని విధాలుగా అండగా ఉండేవారు. ఆయనకు చెందిన మయూఖ టాకీస్ ఫిల్మ్ యాక్టింగ్ స్కూల్ ను ఆమె నిర్వహించేవారు.

ఉత్తేజ్ దంపతులకు ఇద్దరు కుమార్తెలు వున్నారు. ఉత్తేజ్ పెద్ద కుమార్తె చేతన 2017లో వెండి తెరకు పరిచయమైన సంగతి తెలిసిందే. కాగా చిన్న కూతురు పాట ఉన్నత చదువులు చదువుతోంది. కాగా పద్మావతి మరణవార్త తెలిసిన వెంటనే అసుపత్రికి వెళ్లి మెగాస్టార్ చిరంజీవి ఉత్తేజ్ ను పరామర్శించారు. మెగాస్టార్ ను చూడగానే ఉత్తేజ్ భోరున విలపించారు. తన జీవితభాగస్వామి తనను వదిలి వెళ్లిపోయిందని.. ఇక తాను ఒంటరినయ్యానని ఆయన చిన్నపిల్లాడిలా విలపించారు.

చిరంజీవి వస్తుండగానే ఆయన వద్దకు వెళ్లి కాళ్లపై వాళిపోయి ఏడుస్తున్న సన్నివేశం చూసి అక్కడ ఉన్న వారు కన్నీటి పర్యంతం అయ్యారు. ఉత్తేజ్ తో పాటు చేతన కూడా చిరంజీవిని పట్టుకుని విలపించారు. వారిని ఓదార్చడం ఎవరి తరం కావడం లేదు. ఉత్తేజ్ నుతో పాటు ఆయన ఇద్దరి కూతుళ్లను కూడా చిరంజీవి ఓదార్చారు. చేతనను జీవిత రాజశేఖర్ ఓదార్చారు. ఈ ఘటనతో అసుపత్రిలో వున్నవారందరినీ కన్నీళ్లు పెట్టించింది. మెగాస్టార్ తో పాటుగా ప్రకాశ్ రాజ్, జీవిత, బ్రహ్మాజీ తదితరులు కూడా ఉత్తేజ్ ను పరామర్శించారు. ఈరోజు మధ్యాహ్నం మహాప్రస్థానంలో పద్మావతి అంత్యక్రియలు జరగనున్నాయి.