‘శ్రీదేవి సోడా సెంటర్’ నుంచి ‘చుక్కలమేళం’ సాంగ్.!

Posted: 08/17/2021 01:54 PM IST

Chukkala melam song from sudheer babu sridevi soda center

టాలెంటెడ్ బ్యూటీ ఆనంది ఈ ఏడాది జాంబిరెడ్డి సినిమాతో టాలీవుడ్ క‌మ్ బ్యాక్ ఇచ్చిన సంగ‌తి తెలిసిందే. ఈ వ‌రంగ‌ల్ భామ ప్ర‌స్తుతం సుధీర్ బాబు హీరోగా న‌టిస్తోన్న విలేజ్ యాక్ష‌న్ ఎంట‌ర్ టైన‌ర్ ‘శ్రీదేవి సోడా సెంట‌ర్’ సినిమాలో న‌టిస్తోంది. ప‌లాస ఫేం క‌రుణకుమార్ డైరెక్ష‌న్ లో తెర‌కెక్కుతొన్న తాజా చిత్రం విడుదలకు సిద్దంగా వుంది. ఈ నెల 27న ప్రపంచ తెలుగు ప్రేక్షకుల ముందుకు రానుంది. తాజాగా మేక‌ర్స్ ఈ మూవీ నుంచి మరో లిరికల్ వీడియో సాంగ్ ను విడుద‌ల చేశారు.

'చుక్కల మేళం .. దిక్కుల తాళం .. ఒక్కటయే ఈ సంబరం .. ఆ సాంతం నీ సొంతం' అంటూ ఈ పాట సాగుతోంది. ఖవాలి వరుసల్లో మణిశర్మ ఈ బాణీ కట్టారు. ఈ తరహా పాటలు బాగా చేస్తారనే పేరు మణిశర్మకు ఉంది. కల్యాణ్ చక్రవర్తి సాహిత్యం .. అనురాగ్ కులకర్ణి గాత్రంతో ఈ పాట సాగింది. ఈ చిత్రంలోసోడాల శ్రీదేవి పాత్ర‌లో క‌నిపించిన ఆనంది.. ఈ పాటలో మాత్రం పదహారణాల తెలుగుదనంతో కట్టిపడేసేలా అందమైన కుందనపు బొమ్మలా కనిపించింది.

మరోవైపు సుధీర్ బాబు కూడా గడ్డంతో పాటు కొత్త లుక్ తో కనిపిస్తున్నారు. 84 బోట్లతో చిత్రీకరించిన క్లైమాక్స్ ఈ సినిమాకి హైలైట్ గా నిలుస్తుందని చెబుతున్నారు. 70 ఎంఎం ఎంట‌ర్ టైన్ మెంట్స్ బ్యాన‌ర్ పై విజ‌య్ చిల్లా, శ‌శి దేవిరెడ్డి సంయుక్తంగా నిర్మిస్తున్నారు. శ్రీకాకుళం బ్యాక్ డ్రాప్ స్టోరీతో ప‌లాస సినిమా తెర‌కెక్కించి మంచి హిట్టు కొట్టాడు కరుణ కుమార్. ఈ సినిమా స‌క్సెస్ తో అగ్ర నిర్మాత‌ల దృష్టిని ఆక‌ర్షించాడు.