హీరో నితిన్ కు చెక్ పెట్టిన దర్శకుడు ఏలేటి.!

Posted: 10/02/2020 01:25 AM IST

Yeleti cooking chess backdrop for nithin check

భీష్మ చిత్రంతో చక్కటి హిట్ అందుకుని.. ఆ వెంటనే ఓ ఇంటివాడైన హీరో నితిన్ కు టాలీవుడ్ ప్రముఖ దర్శకుడు చంద్ర‌శేఖ‌ర్ ఏలేటి ‘చెక్’ పెడుతున్నాడు. అదేంటని అనుకుంటారా.. చంద్రశేఖర్ ఏలేటి ద‌ర్శ‌క‌త్వంలో నితిన్ న‌టిస్తున్న చిత్రానికి `చెక్‌` అనే టైటిల్ ను చిత్ర యూనిట్ ఇవాళ ఖ‌రారు చేసింది. ఈ మేరకు టైటిల్ పోస్టర్ ను కూడా విడుదల చేసింది. భ‌వ్య క్రియేష‌న్స్ బ్యాన‌ర్‌పై వి. ఆనంద‌ప్ర‌సాద్ ఈ చిత్రాన్ని నిర్మిస్తున్నారు. ర‌కుల్ ప్రీత్‌సింగ్‌, ప్రియా ప్ర‌కాష్ వారియ‌ర్ హీరోయిన్‌లుగా న‌టిస్తున్నారు. గురువారం ఈ చిత్ర టైటిల్‌తో పాటు ప్రీలుక్ పోస్ట‌ర్‌ని స్టార్ డైరెక్ట‌ర్ కొర‌టాల శివ రిలీజ్ చేశారు.

చ‌ద‌రంగం నేప‌థ్యంలో సాగే ఉరిశిక్ష‌ప‌డిన ఓ ఖైదీ క‌థ‌గా ఈ చిత్రాన్ని చంద్ర‌శేఖ‌ర్ ఏలేటి తెర‌కెక్కిస్తున్నారు. ఉరిశిక్ష ప‌డిన ఖైదీగా హీరో నితిన్ ఇందులో క‌నిపించ‌బోతున్నాడు. చిత్రీక‌ర‌ణ చివ‌రి ద‌శ‌కు చేరుకుంది. నితిన్ న‌ట‌న హైలైట్‌గా స్క్రీన్‌ప్లే ప్ర‌ధానంగా ఈ మూవీ సాగ‌నుంద‌ని తెలిసింది. ఈ నెల 12 నుంచి చివ‌రి షెడ్యూల్‌ని ప్రారంభించి ఈ నెలాఖ‌రు వ‌ర‌కు పూర్తి చేయ‌నున్నారు. మ‌ల‌యాళ బ్యూటీ ప్రియా ప్ర‌కాష్ వారియ‌ర్‌కిది తెలుగులో తొలి చిత్రం. పోసాని కృష్ణ‌ముర‌ళి, ముర‌ళీశ‌ర్మ‌, త్రిపుర‌నేని సాయిచంద్‌, సంప‌త్‌రాజ్‌, హ‌ర్ష‌వ‌ర్ధ‌న్‌, రోహిత్ పాథ‌క్ కీల‌క పాత్ర‌ల్లో న‌టిస్తున్నారు.